Թեհրանի տխրահռչակ «Էվին» բանտ այցելած իրանցի խորհրդարանականների խումբը հայտարարել է, որ այնտեղ պայմանները ավելի վատը չեն, քան հյուրանոցում, և այնտեղ բանտարկյալներին կերակրում են ավելի լավ, քան տանը: Այս մասին հայտնում է BBC-ն:
«Էվինը» հայտնի է նրանով, որ այն իրանական խոշորագույն բանտն է, որտեղ պահվում են քաղբանտարկյալները:
«Այդ պահից ես այն կանվանեմ «Էվին» հյուրանոց, այլ ոչ թե բանտ»,- հայտարարել է պատգամավոր Սաֆար Նաեյմին՝ երկուշաբթի բանտ կատարած վեցժամյա այցից հետո:
Վերջին տարիներին բազմաթիվ կալանավորներ, որոնք հիմնականում ճաղերի հետևում են հայտնվել 2009 թվականի նախագահական ընտրություններից հետո, բողոքում են բանտի պայմաններից:
Անցած տարվա դեկտեմբերին 20 բանտարկյալներ բաց նամակ էին հղել բանտի պետին՝ նրան քննադատելով հիվանդ բանտարկյալներին բժշկական օգնություն չցուցաբերելու մեջ, ինչը, նրանց կարծիքով, քաղաքական դրդապատճառներ ունի:
Ինչպես երևում է՝ խորհրդարանականների այցը դարձել է ստեղծված լարվածությունը լիցքաթափելու փորձ:
Սաֆար Նաեյմիի խոսքով՝ բանտային հիվանդանոցը համապատասխանում է որակի բարձրագույն չափորոշիչներին, իսկ խոհանոցը պատրաստում է որակյալ սնունդ և առաջարկում բազմազան մենյու:
Նա հանդիպել է քաղբանտարկյալների հետ, այդ թվում՝ Ֆազեհ Հաշեմի Ռաֆսանջանիի հետ: Վերջինս Իրանի նախկին նախագահ Աքբար Հաշեմիի դուստրն է, որը ազատազրկվել է հակակառավարական հուզումներին մասնակցելու համար: Նա բանտային սննդից բողոքողներից մեկն էր: Ռաֆսանջանին դատապարտվել էր 6 ամսվա ազատազրկման:
«Սննդի որակը «Էվին»-ում ավելի բարձր է, քան իմ տանը»,- ասել է Նաեյմին:
