Խոսելով Գյումրիում տեղի ունեցած ոճրագործությունից՝ ԱՄՆ-ում բնակվող դերասանուհի Ալլա Թումանյանը «Առաջին լրատվական»-ի հետ զրույցում նշեց, որ փաստի առաջ կանգնեցինք, և անգամ խոսքեր չի գտնում կատարվածը բնորոշելու: Իսկ այն դիտարկմանը ի պատասխան, թե հայ իրավապահներրը պահանջում են հայ իրավապահներին հանձնել գործի քննությունը, դերասանուհին նշեց, որ ընդհանրապես քաղաքականությամբ չի զբաղվում:
«Ուղղակի որպես մարդ, անձնավորություն, դերասանուհի՝ կարող եմ ասել, որ կատարվածը սարսափելի է: Իսկ ո՞վ, ի՞նչ, ինչի՞ համար, Հայաստան-Ռուսաստան… Ես ոչ թե չեմ ուզում խառնվել, այլ ուղղակի չեմ կարող կարծիք ունենալ: Դա ավելին է, քան ես գիտեմ: Ես կարող եմ խոսել այն մասին, ինչին լավ տեղյակ եմ»,- հավելեց Ալլա Թումանյանը:
Վերջին տարիներին Հայաստանում, նրա խոսքով, նման սոսկալի եղեռնագործություն էլի է եղել, երբ ընտանիք է գնդակահարվել, և հենց նրա ծանոթների հետ է եղել. Սպանել են միանգամից 3-4 հոգի: «Ես չեմ կարող քննարկել այս դեպքը, ես ուղղակի շատ եմ ցավակցում և ինձ վատ եմ զգում: Եթե մարդը մարդ է, ապա չի կարող անտարբեր մնալ այս ամենի հանդեպ»,- ասաց նա:
