«Առաջին լրատվական»-ի զրուցակիցն է Ժողովրդական կուսակցության առաջնորդ Տիգրան Կարապետյանը:
–Պարոն Կարապետյան, Գյումրիում տեղի ունեցած այդ ողբերգական իրադարձություններից հետո մարդիկ դուրս եկան փողոց և պահանջում են Պերմյակովին հայ իրավապահներին հանձնել: Եվ այս ցույցերին բնավ էլ հակառուսական կոչեր չէին հնչում, թեև ռուսներն ասում են, որ հակառուսական տրամադրություններ են փորձում տարածել: Ձեր կարծիքը կատարվածի վերաբերյալ:
–Իմ կարծիքով, ճիշտ են արել, որ ոտքի են կանգնել: Ճիշտ է արել մեր հայ ժողովուրդը, որ ոտքի է կանգնել։ Թող իմանան, որ մենք էլ ներուժ ունենք և չենք ների: Մնացածը, ասենք՝ հարաբերությունների շատ խզմանը ես դեմ եմ այն առումով, որ գուցե դա սարքած է, գուցե շինծու է: Բացի այդ, ռուսը հասակացավ, որ հայ է կորցնում, ու ամեն ինչ էլ ընդառաջեց և հայտարարեց, իր մեղքը տեսավ և տալիս է հայ իրավապահների ձեռքը գործը:
–Բայց հայ իրավապահների ձեռքը չի տրվում:
–Տվում է, տրվում, արդեն ասել են: Վերջում հենց այդպես էլ կլինի:
–Դուք համաժողովրդական շարժման կողմնակից եք, միացել եք ոչ իշխանական եռյակին: Համաժողովրդական շարժումը, նաև Դուք, չպե՞տք է միանայիք համաժողովրդական սգին: Մենք տեսանք, որ մեր ժողովուրդն այդ օրը մենակ էր, չկար որևէ լիդեր, գրեթե որևէ քաղաքական գործիչ չկար:
–Ոնց չկային, կային, բոլորս էլ հայտարարություն արեցինք: Ես անձամբ, մեր կուսակցությունը հայտարարել է, դատապարտել է: Գրեթե բոլոր կուսակցական ղեկավարները Գյումրի գնացին:Մենք էլ ենք պահանջում և համարում, որ շատ ճիշտ է գործը հայ իրավապահներին հանձնելը:
–Եթե Ռուսաստանն ամբողջությամբ չհանձնի հայ իրավապահներին, հայ-ռուսական հարաբերություններում սեպ չի՞ խրվի:
–Կտրվի, բա ոնց: Դա ներելու բան չէ, որ ներեն: Դա լուրջ խնդիր է:
–Ընդհանրապես, ի՞նչ եք կարծում՝ կատարվածը կարո՞ղ էր մեկ հոգու ձեռքի գործ լինել:
–Շատ տարբեր վարկածներ կան, ես չեմ բացառում ոչ մեկը, որովհետև շատ է խճճված: Եթե ջրի համար է եկել, ինչո՞ւ պետք է իր զգեստն այնտեղ թողնի: Խնդիրներ կան:
–Իսկ չպե՞տք է սգո օր հայտարարվեր: Իշխանություններն էլ, ընդդիմությունն էլ պասիվ էին:
–Ես էլ եմ այդպես համարում, պասիվ էին, մանավանդ իշխանությունը, իշխանությունը անարդար է և վախենում է ռուսից:
–Իսկ ընդդիմությունը չի՞ վախենում:
–Ընդդիմությունն էլ է վախենում, որովհետև ռուսի հետ կապված է: Ես անձամբ հանգիստ եմ, որովհետև ոչ մեկի հետ էլ կապված չեմ:
–Այնուամենայնիվ, որո՞նք պետք է լինեն հետագա քայլերը:
–Պահել այդ ձևաչափի մեջ: Պահանջը ճիշտ է ձևակերպված:
–Իսկ Դուք գյումրեցիների ըմբոստությունն ինչպե՞ս գնահատեցիք:
–Հանրային արձագանքը այդքան էլ բավարար չէ:
–Այսինքն՝ ավելի շատ մա՞րդ պետք է դուրս գար փողոց:
–Այո, պետք է դուրս գար: Պետք է պահանջեն արդար լուծում, պետք է դա չլինի, սխալ է մնացած ամեն ինչը:
–Ըստ Ձեզ՝ Ռուսաստանը ցանկություն ունի՞ հայ իրավապահներին հանձնելու Պերմյակովին, թե ոչ։
–Ռուսը լավ էլ հասկանում է, որ ուրիշ ելք չունի, պետք է ընդունի դա:
–Եթե հանկարծ հայերին չտան գործը քննելու, ստացվում է, որ Հայաստանում ռազմաբազան դառնում է ավելո՞րդ:
–Ես համարում եմ, որ ռազմաբազան պետք է, որովհետև նույն գյումրեցիները… չնայած կարծիք հնչեց, որ ռազմաբազայում գյումրեցիներն աշխատեն որպես ենթասպա: Համենայն դեպս, դա լուծում է հարցին: Ոչ թե ռուս զինվորներ մտնեն, այլ գյումրեցիներ:
Ժողովուրդը պետք է ասի իր կարծիքը, թե չէ քաղաքական գործիչը՝ ի՞նչ:
–Այսինքն՝ եթե մենք ունենայինք արդար ընդդիմություն և իշխանություն…
–Արդար իշխանություն, որովհետև միայն արդար իշխանությունը կարող է պահանջել:
–Սգո օր ինչո՞ւ չհայտարարվեց, դարձյալ վա՞խն էր ռուսից:
–Դե, ես ինչ իմանամ, սգո օր պետք է հայտարարեին, դա շատ սխալ է: Դա իմ կարծիքն է, ամեն մարդ իր կարծիքն ունի: Գործը ոչ թե հինգ հայի մեջ է, այլ եթե մի հայի մազ էլ պակասի, պետք է սգո օր հայտարարել, որովհետև մենք ազգ չենք, որ 100մլն է, մենք հա կոտորվել ենք:
–Գագիկ Ծառուկյանի խորհրդաժողովից ինչ-որ ակնկալիքներ ունե՞ք:
-Կարծումեմ՝փետրվարի 5-ին է տեղի ունենալու: Ես չգիտեմ, դեռ կտեսնենք, ժամանակը ցույց կտա:
–Որո՞նք պետք է լինեն ընդդիմության այս պահի գործողությունները:
–Իմ կարծիքով՝ եթե իշխանությունը առաջ է քաշում սահմանադրական փոփոխությունների առաջարկը, ապա ընդդիմությունը պետք է ակտիվանա: Թույլ չտա, որ իշխանությունը վերարտադրվի:
