Մեծ Բրիտանիայի ԱԳՆ-ը իր հպատակներին կոչ է արել անհապաղ լքել Լիբիայի Բենղազի քաղաքը՝ արևմտյան երկրների քաղաքացիների նկատմամբ ահաբեկչության սպառնալիքի պատճառով։
ԱԳՆ-ը հայտարարել է, որ ստույգ տեղեկատվություն ունի արևմտյան երկրների քաղաքացիների դեմ ահաբեկչական գործողությունների կազմակերպման մասին։
ԶԼՄ-ները ենթադրում են, որ սպառնալիքը կարող է կապված լինել հունվարին Ալժիրի ահաբեկչության հետ, երբ իսլամիստ գրոհայինները հարձակվել էին նավթագազային համալիրի վրա և պատանդներ վերցրել. զոհվել էր 38 պատանդ, որից 37-ը՝ օտարերկրացիներ։ ԱՄՆ պետքարտուղարը հայտարարել է, որ գրոհայիններն օգտագործել են հարևան Լիբիային տրամադրված զենքը։
Անցյալ տարվա սեպտեմբերին Բենղազիում հարձակման էր ենթարկվել ամերիկյան հյուպատոսությունը, որի հետևանքով զոհվել էին ԱՄՆ դեսպանը և 3 ամերիկացիներ։
Ըստ բրիտանական ԶԼՄ-ների՝ Բենղազիում կան բրիտանացիներ, որոնք աշխատում են արևմտյան նավթային ընկերություններում։
