«Ես հասկանում եմ, ու շատերն են հասկանում, որ սա քաղաքական որոշման հարց է: Կոստանյանը չի որոշում: Ամենայն հավանականությամբ, նրան զոհաբերել են: Ասել են՝ գնա, շառը վրեդ առ, տեսնենք՝ ինչ ենք անում էս արանքում»,- այսօր լրագրողների հետ զրույցում անդրադառնալով Գյումրիի ընտանիքին սպանած ռուս զինծառայող Վալերի Պերմյակովին Հայաստանի արդարադատությանը հանձնելու մասին հարցին՝ ասաց Գյումրիի ժուռնալիստների «Ասպարեզ» ակումբի նախագահ Լևոն Բարսեղյանը:
Լ.Բարսեղյանն այսօր Ազգային ժողովում մասնակցում էր այդ ոճրագործության պատճառով հրավիրված լսումներին, որտեղ պատգամավորների հարցերին պատասխանում էր գլխավոր դատախազ Գևորգ Կոստանյանը:
«Կոստանյանը որևէ նոր բան չասաց: Փորձեք դուք իր երկու ժամվա խոսածը մաղել, կտեսնեք, որ տակը որևէ արժեքավոր տեղեկություն չի մնացել: Նույնիսկ մեղքս սկսեց տալ, սկսեցի խղճալ, թե էս մարդուն ուր են գցել, չլում են, չարչարում են: Այսինքն՝ ժամանակն է, որ դատախազությունը վերանվանվի կրուտիտների քոլեջի նման մի բանի: Չի կարելի այս ձևով մալպուլյատիվ պատասխաններ տալ: Դեպքից անցել է 10 օր, մարդը չի կռահել, որ քրեական գործ պիտի հարուցի օտար զինվորի՝ Հայաստանում զենքով ֆռֆռալու և հետախուզություն իրականացնելու համար»,- ասաց Լ.Բարսեղյանը:
Վերջինիս խոսքով՝ բուն հանցագործությունից՝ Ավետիսյանների ընտանիքին սպանելուց հետո կատարվել է ևս երկու հանցագործություն՝ սահմանը հատելու փորձը և Պերմյակովին ռուսներին հանձնելու հանգամանքը: Եվ այս հանգամանքներն ու Պերմյակովի ինքնախոստովանական ցուցմունքը բավարար էին, որ Գ.Կոստանյանը Ռուսաստանին այդ զինվորին ՀՀ արդարադատությանը հանձնելու պահանջ ներկայացներ: «Հիմա այս մարդիկ ինչքան փակ են պահում, ինչքան քիչ են տեղեկություն տալիս, ինչքան շատ են հղումներ անում բոլոր այն հնարավոր հոդվածներին և իրավական կազուսներին, այնքան մարդկանց կատաղությունն աճում է: Իսկ մարդիկ ցույց տվեցին, որ թքած ունեն, ուզում ես՝ տանկեր բեր քաղաքի վրա, ելնելու են ջարդեն: Հիմա եթե դասեր չքաղեցին, այս խնդիրները չլուծեցին, մի օր մի տեղից դա դուրս է գալու»,- ասում է Լ.Բարսեղյանը:
Վերջինս նաև հաստատում է, որ այդ ոճրագործությունից ու հատկապես Պերմյակովին հայկական կողմին չհանձնելու պատճառով Գյումրիում առկա է բավականին մեծ լարվածություն: Գյումրեցիների շրջանում խորանում են նաև հակառուսական տրամադրությունները: «Ճիշտ է, խանութների մոտ և այլ տարածքներում կա ոստիկանական հսկողություն, բայց ոչ ոք երաշխիք չունի, որ մի տարի ոչինչ չի լինի: Կարող է մի օր մեկի քեֆը լավ լինի… Հիմա որքան ուշացնում են բացահայտումը, արդար դատաքննությունը, այնքան այդ ռիսկերն աճում են: Զաժիգալկով դատախազին ե՞րբ են խփում: Մարդը դեմը կանգնած է և գիտի, որ իրեն նկարում են, բայց զաժիգալկով խփում է դատախազին: Հայաստանում նման բան տեսե՞լ էիք: Մարդկանց հոգուն հասել էր, արեցին: Էլի կանեն»,- եզրափակում է Լ.Բարսեղյանը:
