ՌԴ-ի 500 մլն ԱՄՆ դոլար (կամ 185 մլրդ ՀՀ դրամ) վարկային միջոցներից 2009-2011 թվականներին օգտագործվել է 160,8 մլրդ դրամի գումար: Այս մասին ասվում է ՀՀ ֆինանսների նախարարության կողմից «Առաջին լրատվականին» ուղղված պատասխան նամակում: Այսինքն` մնացած մոտ 24 մլրդ դրամը դեռ չի ծախսվել:
«Ընդ որում տնտեսության վարկավորմանն է ուղղվել 85,4 մլրդ դրամ, որից.
• 66,5 մլրդ դրամ` ֆինանսաբանկային համակարգի միջոցով,
• մոտ 1,2 մլրդ դրամ` ՓՄՁ ներդրումներ ունիվերսալ վարկային ՓԲԸ կազմակերպության միջոցով,
• շուրջ 17,8 մլրդ դրամ համակարգաստեղծ կամ խոշոր ենթակառուցվածքների գործունեությունը ապահովող սուբյեկտներին»,- նշված է այդ նամակում:
Ծախսված 160.8 մլրդ դրամ գումարի մնացած մասը` 75.4 մլրդ դրամը, բաշխվել է հետևյալ կերպ: «ՀՀ ՓՄՁ ԶԱԿ հիմնադրամի միջոցով իրականացվող վարկավորումը նշված ժամանակահատվածում կազմել է 4,3 մլրդ դրամ: «ՀայՌուսգազարդ» ընկերության վարկավորումը կազմում է 15,6 մլրդ դրամ:
ՌԴ-ի վարկային միջոցներից 2009-2010 թվականներին կատարվել են նաև որոշ ծախսեր, այդ թվում` աղետի գոտում իրականացվող վերանորոգման ծրագրի գծով` 52.9 մլրդ դրամ, Հայաստանի ՓՄՁ ԶԱԿ հիմնադրամի գույքային ներդրման և «Թամարա ֆրութ» ՓԲԸ օրգանիկ այգիների ստեղծմանն աջակցելու ծրագրի գծով` 1,3 մլրդ դրամ, «Հազարամյակի մարտահրավերներ» ծրագրի ճանապարհաշինության կասեցված ենթածրագրի շարունակման և ավարտման մասով` 1.2 մլրդ դրամ»,- նշված է ՀՀ ֆինանսների նախարարության պատասխանում: