Ինչպես «Առաջին լրատվականն» արդեն տեղեկացրել էր, որ Ռոբերտ Քոչարյանը այս անգամ դատական հայց է ներկայացրել «Հրապարակ» թերթի դեմ: Խնդրի շուրջ զրուցեցինք Մամուլի ազգային ակումբի նախագահ Նարինե Մկրտչյանի հետ:
Ըստ Ն.Մկրտչյանի ` այս հարցը պետք է քննարկել իրավական, հասարակական, բարոյական և քաղաքական հարթություններում: ՄԱԱ նախագահի դիտարկմամբ, ԶԼՄ-ների գործունեությանն առնչվող բազում խնդիրներ կան իրավական դաշտում, սակայն հարցն այն է, որ «քաղաքական կամք» ունենալու դեպքում կարելի է ցանկացած թերթի զրպարտանքի մեջ մեղադրել և փակել:
Նարինե Մկրտչյանը հիշեցրեց մի պատմություն. «Նացիստական կառավարության հռչակումից առաջ արդեն հրեաներին ոչնչացնելու ծրագրեր կային: Երբ Վերգեյին ասում են` չենք կարող ոչնչացնել, քանի որ օրինական իրավունք չունենք, նա պատասխանում է. «Մենք հրեաներին կսպանենք մեր օրենքը հարմարեցնելով դրան»»:
Հասարակական հարթությունում խնդիրն այն է, որ հասարակությունը, որքան էլ տխրի այս կամ այն թերթի փակվելու առթիվ, որևէ գործողության չի գնա: Հանրության այս կեցվածքը ևս նպաստում է ԶԼՄ-ների հանդեպ կամայականություններ թույլ տալուն:
«Ռոբերտ Քոչարյանի պարագայում բարոյական հարթության մասին խոսելն անիմաստ եմ համարում»,- համոզված է Նարինե Մկրտչյանը:
Քաղաքական դրդապատճառները թեև նվազագույն ազդեցություն պիտի ունենան ԶԼՄ-ների ինքնակառավարման հարցում, սակայն, ինչպես հավատացած է ՄԱԱ նախագահը, Հայաստանում բոլոր խնդիրները միայն քաղաքական լուծում են ստանում, ուստի քաղաքական հիմքն է ամենակարևորը նաև ԶԼՄ-ների դեմ ուղղված գործողություններում: