Գյումրիում տեղի ունեցած ողբերգությունը քաղաքականացնելու փորձերն անթույլատրելի են: Այս մասին ինչպես հաղորդում է RIA Novosti-ն, հայտարարել է Ռուսաստանի արտգործնախարար Սերգեյ Լավրովը՝ ցավակցություն հայտնելով հայ ժողովրդին:
«Մենք տեսնում ենք, որ փորձեր են արվում քաղաքականացնել այդ իրավիճակը: Դրանք դուրս են գալիս ո՛չ Հայաստանի ղեկավարության, ո՛չ էլ Ռուսաստանի ղեկավարության կողմից: Քիչ չեն այնպիսիք, ովքեր ցանկանում են օգտագործել այդ ողբերգությունը՝ որոշ աշխարհաքաղաքական առավելություններ ստանալու համար: Դա նողկալի է, դա անթույլատրելի է, դա հարիր չէ հպարտ հայ ժողովրդին»,- ասել է Լավրովը այսօր տեղի ունեցած մամուլի ասուլիսին:
Ռուսաստանի արտգործնախարարը նշել է, որ իրենք կանենա մեն բան, որպեսզի «այդ հանցագործությունը անպատիժ չմնա, որպեսզի մեղավորն ամենախիստ ձևով պատիժ կրի»: «Մենք ամեն ինչ կանենք, որպեսզի նման բան այլևս տեղի չունենա»,- ասել է Լավրովը՝ հավելելով, որ մեղադրյալի դատավարությունը կլինի առավելագույն կերպով բաց, որը կկայացնի ադեկվատ և օբյեկտիվ դատավճիռ:
«ՄԵնք հաստատում ենք, որ դատավարությունը կանցկացվի Հայաստանի տարածքում, այն կլինի առավելագույն կերպով բաց, համատեղ: Ես համոզված եմ, որ դատարանը արագ օբյեկտիվ և ադեկվատ վճիռ կկայացնի, ինչպես որ հարիր է իրականացված սարսափելի հանցագործությանը»,- ասել է նա:
