Վրացական Apsny.ge կայքի հաղորդմամբ, Վրաստանը տարածքներ է կորցնում Սև ծովի ափամերձ հատվածում: Այս մասին հայտարարել է Վրաստանի «Կանաչների» կուսակցությունը: Վերջինիս ղեկավար Գիորգի Գաչեչիլաձեի խոսքերով, տարածքային կորուստների պատճառը ծովի փոփոխություններն են, ինչը, սակայն, պայմանավորված է ոչ թե բնական պատճառներով, այլ` մարդկային միջամտության գործոնով.
«Սև ծովի ափամերձ հատվածում տագնապահարույց իրավիճակ է առաջացել: Երբ թուրքերն ամբարտակներ կառուցեցին Ճորոխ գետի վրա, մեր ափամերձ հատվածը սկսեց կորցնել իր հիմնական նյութը` ավազն ու քարը: Դրանք այստեղ էին հասցվում Ճորոխ գետի միջոցով, որը Վրաստանի տարածքում թափվում է Սև ծով:
Մինչդեռ այժմ գետի վրա կառուցված ամբարտակների պատճառով դրանք մնում են Թուրքիայում, իսկ ահա, ասենք, Բաթումում ծովն առավել է խրվում ափի մեջ: Այս ամենի մեղավորը թուրքերն ու նրանց ամբարտակներն են: Օրինակ՝ Փոթիում ծովն արդեն առաջ է շարժվել 1 կիլոմետրով, ինչի արդյունքում այնտեղ ջրի տակ են հայտնվել մի շարք շինություններ»:
Հիշեցնենք, որ օրեր առաջ էլ նույն աղբյուրը հայտնեց, որ վրաց-ադրբեջանական սահմանին կատարվել է 69 տարածքային ուղղում, որոնցից 42-ը եղել են ի վնաս Վրաստանի, իսկ 27-ը` ի վնաս Ադրբեջանի: Արդյունքում, Վրաստանի տարածքային կորուստները կազմել են մոտ 293 հեկտար:
Ինչ վերաբերում է սևծովյան հատվածում Վրաստանի տարածքային կորստյան գործընթացում Թուրքիայի մեղավորության մասնաբաժնին, ապա հարկ է ընդգծել, որ ներկայումս Թուրքիան Վրաստանին սահմանակից Արտվին նահանգում` Ճորոխ գետի վրա, կառուցում է Դերիներ ամբարտակն ու հիդրոէլեկտրակայանը:
Ամբարտակն իր մեջ կարող է ամբարել 3.5 միլիոն խորանարդ մետր ջուր, այն ունենալու է 207 մետր բարձրություն, ինչն աննախադեպ է Թուրքիայի պատմության մեջ: Դերիների հիդրոէլեկտրակայանն էլ ունենալու է 670 Մեգավատտ հզորություն և տարեկան կարտադրի 2.118 Գեգավատտ/ժամ էլեկտրաէներգիա: