Wikileaks-ի հիմնադիր Ջուլիան Ասանժը իրեն նվիրված ֆիլմի սցենարը քննադատության է ենթարկել,- հաղորդում է Agence France-Presse-ը:
Գտնվելով Լոնդոնում Էկվադորի դերսպանատանը՝ Ասանժը իր կարծիքն է հայտնել ֆիլմի վերաբերյալ Օքսվորդի համալսարանի ուսանողների հետ վիդեոկապի ժամանակ:
Wikileaks-ի հիմնադիրը ծանոթացել է սցենարի հետ և եզրակացություն է արել, որ դա ամբողջությամբ կեղծիք և քարոզչություն է:
Բացի այդ, նա ֆիլմը ստեղծողներին մեղադրել է Իրանի դեմ թշնամանքի հրահրման մեջ, քանի որ սցենարում ակնարկներ կան, թե Իրանը միջուկային զենք է ստեղծում:
«Հինգերորդ իշխանություն» անվամբ ֆիլմը, որի գլխավոր հերոսը Ջուլիան Ասանժն է, ստեղծվում է Dreamworks ստուդիայում: Ֆիլմը նկարահանվում է մասնավորապես հաքեր Դանիել Դոմշայթ-Բերգի հիշողությունների հիման վրա, որը 2007-2010 թթ. ընթացքում համագործակցել է Ասանժի հետ:
Ասանժի դերը բաժին է հասել դերասան Բենեդիկտ Կամբերբետչին, իսկ Դոմշայթ-Բերգի դերը կկատարի գերմանացի դերասան Դանիել Բրյուլը:
