Արժույթի միջազգային հիմնադրամը կանխատեսում է, որ այս տարի համաշխարհային շուկաներում նավթի միջին գինը կլինի 56.73 դոլար մեկ բարելի դիմաց, հաջորդ տարի՝ 63.88 դոլար: Նման թվեր են նշված համաշխարհային տնտեսության վիճակի և մոտակա հետանկարների մասին թարմացված զեկույցում՝ գրում է TASS-ը:
Համեմատության համար նշվում է, որ 2014-ին նավթի միջին գինը կազմել է 96.26 դոլար 1 բարելի դիմաց:
Վիճակագրությանը վերաբերող մեկնաբանություններում ասվում է, որ անցալ տարվա սեպտեմբերից ի վեր նավթի գները նվազել են մոտ 55 տոկոսով:
«Այդ անկումը մասնավորապես բացատրվում է որոշ խոշոր տնտեսությունների պահանջարկի անսպասելի թուլացմամբ՝ հատկապես այն երկրների, որոնք ձևավորում են շուկան»,- գրում են հեղինակները:
Սակայն ածխաջրածինները նկատելիորեն ավելի շատ են էժանացել, քան մետաղները, ինչը, ըստ փորձագետների՝ «խոսում է նավթի առաջարկի գործոնների կարևորության մասին», ներառյալ ՕՊԵԿ-ի որոշումը` պահպանել արդյունահանման մակարդակը այլ աղբյուրներից, մասնավորապես ԱՄՆ-ից մատակարարման աճի պայմաններում:
«Նավթային ֆյուչերսների գները մատնանշում են առաջիկա տարիներին նավթի գների մասամբ վերականգնումը՝ ներդրումների հոսքի վրա ցածր գների սպասելի բացասական ազդեցությամբ, ինչպես նաև նավթային ոլորտում հզորությունների ապագա աճով»,- ասվում է զեկույցում:
