Թուրքիայի տարածքում ՆԱՏՕ-ի Patriot զենիթա-հրթիռային համալիրների տեղակայմանը դեմ ցույցի մասնակիցները հարձակվել են Իսկենդերունի Միջերկրականի նավահանգստում տեղակայված գերմանացի զինվորականների վրա, որոնք այնտեղ են համալիրների սպասարկումն ապահովելու առաքելությամբ: Այս մասին հայտնում է իրանական Press TV-ն:
Թուրքիայի Աշխատավորական կուսակցությանը կից երիտասարդական միության անդամները քաղաքի կենտրոնում հարձակվել են զինվորականների վրա ու փորձել նրանց գլխին տոպրակներ քաշել:
Քաղաքի դատախազի գրասենյակի տեղեկություններով՝ 14 ակտիվիստ է ձերբակալվել, ևս 28-ի դեմ առաջադրվել է մարդու առողջությանը միտումնավոր վնաս հասցնելու մեղադրանք:
Բողոքի ակցիա է անցկացվել նաև մայրաքաղաք Անկարայում: Ցուցարարները իրենց դժգոհությունն են արտահայտել ՆԱՏՕ-ի հրթիռային համակարգերի տեղակայման և երկրում օտարերկրյա զորքերի ներկայության դեմ:
Հիշեցնենք, որ վերջին օրերին նմանօրինակ ակցիաներ էին անցկացվել նաև Թուրքիայում Գերմանիայի և ԱՄՆ-ի դեսպանությունների մոտ:
ՆԱՏՕ-ի առաքելության կազմում Գերմանիայի և Նիդերլանդների տրամադրած հրթիռային համալիրները Թուրքիա են բերվել երկուշաբթի: