2001-ից վեր ՅՈՒՆԵՍԿՕ-ի որոշմամբ հունվարի 16-ին նշվում է բոլոր ժամանակների և ժողովուրդների հայտնի երաժշտական խմբի՝ Լիվերպուլի լեգենդար քառյակի՝ The Beatles-ի համաշխարհային օրը՝ գրում է Calend-ը:
Ամսաթիվը պատահաբար չէր ընտրվել. 1957-ի այդ օրը Լիվերպուլում բացվել է The Cavern ակումբը, որտեղից իրենց փառքի ուղին են սկսել դեռևս անհայտ երաժիշտներ Ջոն Լենոնը, Փոլ Մաքարթնին և Ջորջ Հարիսոնը, որոնց կես տարի անց միացավ նաև Ռինգո Սթարը:
Հունվարի 16-ին ավելի ուշ The Beatles-ի պատմության մեջ տեղի ունեցավ ևս մեկ նշանավոր իրադարձություն: 1964-ի այդ օրը Cashbox պարբերականը I Want To Hold Your Hand երգին հատկացրեց առաջին տեղը ամերիկյան հիթ շքերթում, որից հետո սինգլը ընդամենը 10 օրվա ընթացքում վաճառվեց միլիոնավոր օրինակներով:
Սովորական կազմով The Beatles-ն աշխատել է 8 տարի: Այդ ընթացքում պաշտոնապես թողարկվել է 13 ալբոմ, որոնցում ընդգրկված յուրաքանչյուր երգ դարձավ իսկական հիթ: