Ճապոնական NEC կորպորացիան համարձակ գաղափար է իրականացրել. ընկերությունը ներկայացրել է երկէկրան Medias W N-05E սմարթֆոնը: The Verge պարբերականի լրագրողներին բախտ է վիճակվել փորձարկել արտասովոր նորույթը:
Գաջեթն ունի 4.3 դյույմանոց երկու HD դիսփլեյներ, որոնցից մեկը օգտատիրոջ ցանկության դեպքում կարող է հետ հրվել: Հեռախոսն ունի 1.5 գիգահերց հաճախականությամբ պրոցեսոր, աշխատում է Android 4.1 օպերացիոն համակարգով:
Հավելյալ էկրանը կարող է օգտագործվել ինտերֆեյսի ընդլայնման համար, կամ այն կարելի է օգտագործել առանձին:
The Verge-ը նշում է, որ երկու էկրանի միջոցով նավիգացիայից օգտվելն ավելի հարմար է, քան սովորական սմարթֆոնով: Նոր սմարթֆոնը հեշտացնում է նաև տեքստի հավաքումը:
Ցավոք, նոր սմարթֆոնի հավելվածների թիվը քիչ է: Ծրագրերի մեծ մասն աշխատում է մեկ էկրանի ռեժիմում՝ անիմաստ դարձնելով նոր գաղափարի իրականացումը:
Երբ երկրորդ էկրանը հետ է հրվում, սարքի հաստությունը կազմում է 12.2 մմ: Լրագրողները հայտնում են, որ սարքը ձեռքում պահելը շատ հարմար է, իսկ դիզայնը առանձնանում է «ռետրո-հմայքով»:
Դեռևս հայտնի չէ, թե այն երբ կհայտնվի համաշխարհային շուկայում, և առհասարակ` կհայտնվի՞, թե՞ ոչ:
