Ոստիկանությունն օրեր առաջ հրապարակեց Հայաստանի ընտրողների թիվը` 2.507.960:
Նշենք, որ անցած տարվա մայիսին անցկացված խորհրդարանական ընտրությունների ժամանակ ցուցակներում ընդգրկված էր 2.485.844 մարդ, այսինքն՝ քվեարկողների թիվն ավելացել է ավելի քան 22 հազարով:
Մինչդեռ ԼՂՀ նախկին արտգործնախարար, նախագահի թեկնածու Արման Մելիքյանը պահանջել էր հրապարակել նաև Հայաստանից հեռացածների և երկքաղաքացիություն ունեցողների թիվը: «Առաջին լրատվական»-ի հետ զրույցում թեկնածուն ասաց, որ իր պահանջը հասցեագրել է ՀՀ ոստիկանության անձնագրային և վիզաների վարչությանը, սակայն դեռևս որևէ պատասխան չկա։ «Ես սա գնահատում եմ երկխոսության համար որոշակի սկիզբ: ԿԸՀ-ի նիստում էլ եմ ասել՝ անգամ հանձնաժողովի անդամներից որևէ մեկը չի կարող ասել, թե Հայաստանում այսօր քանի ընտրող է մնացել: Նախկինում ի հաշիվ դրան կեղծվել են համապետական ընտրությունները, ես այս տվյալների հրապարակումը շատ կարևոր եմ համարում: Բոլոր դեպքերում մեր խնդիրն այն չէ, որ անառողջ աժեոտաժ սկսենք հարցի շուրջ, մեր խնդիրն այն է, որ կարողանանք այս հարցում ցանկացած կասկածելի հանգամանք վերացնել: Այդ առումով ակնկալում եմ նաև Հայաստանի իշխանությունների կողմից համապատասխան վերաբերմունք»,- ասաց Արման Մելիքյանը:
Իր հերթին ՀՀ ոստիկանության անձնագրային և վիզաների վարչության պետ Հովհաննես Քոչարյանը մեզ հետ զրույցում նշեց, որ առայժմ Արման Մելիքյանի դիմումը չի ստացել, ստանալու դեպքում կարող է հրապարակել երկքաղաքացիություն ունեցողների թիվը, իսկ Հայաստանից գնացածների թիվն իր մոտ չկա և, բնականաբար, ինքը դա հրապարակել չի կարող:
