«Աննորմալ կլիներ, եթե հանկարծ պարոն Բալասանյանը չպաշտպաներ Սերժ Սարգսյանին: Գործող նախագահը Գյումրիի քաղաքապետի ընտրություններից մի քանի օր առաջ հայտարարեց, որ պարոն Բալասանյանը իր նախընտրած թեկնածուն է, և հնարավոր չէ պատկերացնել, որ իր նախընտրած թեկնածուն հանկարծ մի քանի ամիս հետո հայտարարի, թե ինքը չի պաշտպանելու նախագահին»,- «Առաջին լրատվական»-ի հետ զրույցում ասաց գյումրեցի քաղաքագետ Գագիկ Համբարյանը.
«Ես արդեն ասել եմ, որ ԲՀԿ-ի մարզային կառույցը շատ խայտաբղետ է. կան մարդիկ, որոնք համագործակցում են իշխանությունների հետ, կան նաև հակառակ դիրքորոշում ունեցողներ: Ազգային ժողովի ընտրությունների ժամանակ Սամվել Բալասանյանի համար բոլոր պայմանները ստեղծվեցին, որպեսզի նա շատ հանգիստ դառնա պատգամավոր, իսկ Մարտուն Գրիգորյանի համար ստեղծվեցին բոլոր պայմանները, որպեսզի նա չընտրվի, բայց ինքն ընտրվեց: Պետք է նշեմ, որ շատ համառ պայքար էր գնում ԲՀԿ-ի և Հանրապետականի միջև նաև Արթիկ-Մարալիկ տարածաշրջանում, որտեղ ևս հաղթեց ԲՀԿ-ն:
Եթե հանրապետության նախագահը ցանկանում է Շիրակի մարզից ավելի շատ ձայներ հավաքել, կարող է բանակցել այստեղի ԲՀԿ-ի ներկայացուցիչների հետ և բոլորի հետ էլ առանձին-առանձին պայմանավորվածություն ձեռք բերել՝ թե որը ինչ կստանա նախագահական ընտրություններից հետո: Այնպես որ` Բալասանյանը մենակ չէ»,- կարծում է քաղաքագետը:
Մեր հարցին, թե նախագահին աջակցությունը կարո՞ղ է հանգեցնել նրան, որ ԲՀԿ-ն ի վերջո ՀՀԿ-ի հետ կոալիցիա կազմի, Գագիկ Համբարյանը պատասխանեց. «Դա հնարավոր տարբերակներից մեկն է և՛ ԲՀԿ-ի, և՛ ՀՅԴ-ի համար:
Եթե ընտրություններից առաջ կամ ընտրությունների ընթացքում ԲՀԿ-ն լիովին համագործակցեր իշխանությունների հետ, ապա իրենք կհայտնվեին այն իրավիճակում, ինչին բախվեց ՕԵԿ-ը 2008 թվականի նախագահական ընտրություններից հետո: Այս ամենն էլ հաշվի առնելով` իրենք բացեիբաց չհամագործակցեցին:
Հանրապետության նախագահը բոլոր հնարավորություններն ունի տեղերում համագործակցելու ԲՀԿ-ի ուժերի հետ՝ թե Կոտայքի մարզում, թե Շիրակի մարզում, թե Վայոց ձորում, որտեղ ևս Եղեգնաձորի քաղաքապետը ԲՀԿ-ական է:
Ես չեմ կարծում, որ այդ ուժերը ևս նախագահական ընտրություններից առաջ դեմ կաշխատեն կամ չեն օգնի գործող իշխանություններին:
«Օրինաց երկիրը» մինչև 2008 թվականի մարտի մեկը բավականին ամուր դիրքեր ունեցող կուսակցություն էր հենց Շիրակի մարզում: Մեծ մասամբ ՕԵԿ-ը լքած անձինք դարձան ԲՀԿ-ականներ: Այժմ իշխանությունները` հաշվի առնելով այն հանգամանքը, թե ՕԵԿ-ն ինչպիսի վայրիվերումներ ունեցավ ժողովրդի մոտ, գերադասեցին չհավասարեցնել ԲՀԿ-ն ՕԵԿ-ին, բացի այդ` ոչ միայն իշխանությունները, այլև ԲՀԿ առաջնորդ Գագիկ Ծառուկյանը նույնպես չի ուզում, որպեսզի ԲՀԿ-ն առերևույթ դառնա Հանրապետական կուսակցությանը կից ուժ»:
Մենք զրուցեցինք նաև մի քանի ԲՀԿ-ական գյուղապետերի հետ: Վերջիններս հիմնականում նախընտրում էին ԲՀԿ-ՀՀԿ համագործակցության կամ կոալիցիայի մասին ընդհանրապես չխոսել` ասելով, որ դա իրենց չի վերաբերում: Իսկ, օրինակ, Ձորաղբյուրի գյուղապետ Արայիկ Մուքայելյանն ասաց. «Քաղխորհուրդն ինչպես որոշի, այնպես էլ առաջ կշարժվենք»:
