Հինգշաբթի կհայտարարվեն Ստամբուլի երրորդ օդանավակայանի շինարարության մրցույթի պայմանները: Ինչպես սպասվում է՝ 150 մլն ուղևոր թողունակության հնարավորությամբ օդանավակայանի շինարարության մրցույթը կկայանա ապրիլին: Այս մասին հայտնում է MK-Turkey-ը:
Մրցույթի վերջնական ձևաչափը կորոշվի չորեքշաբթի կայանալիք խորհրդակցությունից հետո, որն Անկարայում կանցացնի տրանսպորտի և կապի նախարար Բինալի Յըլդըրըմը:
Նշվում է, որ մրցույթը նախատեսում է կապալառուի կողմից շահագործում 25 տարի ժամկետով: Համաձայն գործող սխեմայի՝ կապալառուն պատասխանատու է օդանավակայանի շինարարության, շահագործման և հաջորդ կապալառուին փոխանցելու համար:
Երրորդ օդանավակայանի նախագիծը, որը ներդրումների ծավալով պետության և մասնավոր կապիտալի խոշորագույն համատեղ նախագիծ է, կիրականացվի չորս փուլով: Սպասվում է, որ նախագծի առաջին փուլը կավարտվի 2016 թվականին և կարժենա 7 մլրդ եվրո: Նոր օդանավակայանը կունենա 4 կմ-անոց 6 թռիչքուղի: Դրանցից 4-ը կկառուցվեն Սև ծովի ափին զուգահեռ, մյուս երկուսը՝ ուղղահայաց: