Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում՝ դատավոր Արմեն Խաչատրյանի վարույթում է Արսեն Իսրայելյանի գործը:
43-ամյա Արսեն Իսրայելյանը ոստիկանության ՊՊԳՎ ավագ ոստիկան է եղել: Նա հասարակական կարգն ու անվտանգությունն ապահովելու նպատակով ծառայություն է իրականացրել «ՎՏԲ-Հայաստան» բանկի 4-րդ մասնաճյուղում:
2014 թվականի օգոստոսի 19-ին Արսեն Իսրայելյանը գտնվել է ծառայության մեջ: Նա բանկի մասնաճյուղի նախաբունկերում օգնության կարգով մասնակցել է մասնաճյուղի կառավարչի ու ավագ մասնագետի կողմից բանկոմատի դրամապանակները լիցքավորելուն:
Ըստ մեղադրանքի՝ մինչև ինկասացիայի աշխատողների կողմից բանկոմատի դրամապանակների տեղափոխումը՝ ավագ ոստիկան Արսեն Իսրայելյանը ուրիշի գույքը հափշտակելու դիտավորությամբ այդ դրամապանակները տեղավորել է տեսախցիկի տեսադաշտից դուրս՝ նախաբունկերի հետնամասում:
Այնուհետև, օգտվելով բանկի աշխատողների կարճատև բացակայությունից, առաջադրված մեղադրանքի համաձայն՝ Արսեն Իսրայելյանը բանկոմատի լիցքավորման համար նախատեսված դրամապանակի կապարակնիքը քաշել-բացելու միջոցով այնտեղից գաղտնի հափշտակել է 92 հատ 10 հազար դրամանոց թղթադրամ՝ արդյունքում բանկից հափշտակելով 920 հազար դրամ գումար:
Արսեն Իսրայելյանին մեղադրանք է առաջադրված գողության համար՝ ՀՀ քրեական օրենսգրքի 177 հոդվածի 2-րդ մասի 2-րդ կետով:
Այս գործով դատական նիստը նշանակվել է 2015 թվականի փետրվարի 3-ին: