Թուրքիայում ձախերն ու ազգայնականները բողոքի ակցիաներ են անցկացրել երկրում ՆԱՏՕ-ի Patriot զենիթա-հրթիռային համալիրների տեղակայման դեմ: Այս մասին հայտնում է Reuters գործակալությունը:
Երեկ, երբ հակահրթիռային համալիրներով բեռնված տասնյակ գերմանական նավեր կանգ էին առել Իսկենդերունի Միջերկրականի նավահանգստում, Թուրքիայի կոմունիստական կուսակցության շուրջ 150 կողմնակիցներ ծխառումբեր են վառել և նավահանգստի մուտքի մոտ այրել ամերիկյան դրոշը:
Այդ օրը` ավելի ուշ, մոտ 1000 մարդու մասնակցությամբ բողոքի ակցիա է անցկացվել Իսկենդերունի կենտրոնում: «Յանկի´, տուն գնա», «Մարդասպան Ամերիկա´, հեռացի´ր Մերձավոր Արևելքից» վանկարկել են հավաքվածները:
Ցուցարարներից մեկի խոսքով՝ այստեղ խնդիրը Սիրիան չէ, այլ «կոլաբորացիոնիստ» կառավարությունը: Ոստիկանությունը ձերբակալել է ակցիայի մի շարք մասնակիցների:
Հիշեցնենք՝ Թուրքիա բերված համալիրները կտեղակայվեն երկրի հարավ-արևելքում՝ Սիրիայի հետ սահմանին: Գերմանիան 240 զինվորական անձնակազմ է տրամադրել հրթիռային համալիրների սպասարկման համար: