Ադրբեջանական Apa.az կայքի փոխանցմամբ, Բալթյան երկրների շուկայում առաջատարներից մեկը հանդիսացող լատվիական Jāņa Sēta հրատարակչատանը տպագրված Ադրբեջանի քաղաքական քարտեզը մեծ դժգոհություն է առաջացրել Ադրբեջանում:
Նշվում է, որ դրանցում Լեռնային Ղարաբաղն ու դրան հարակից 7 շրջանները նշված են որպես վիճելի տարածքներ` Ադրբեջանի ու Հայաստանի միջև: Բացի այդ, դժգոհության մեծ տեղիք է տվել ԼՂՀ-ի դրոշի պատկերումը քարտեզի վրա:
Սակայն լատվիական հրատարակչատան գլխավոր խմբագիր Յանիս Տուրլաիսն անմիջապես պատասխանել է ադրբեջանական կողմին. «Մեր քարտեզագրությունն ունի սեփական սկզբունքները. ցույց տալ դե-ֆակտո (փաստացիորեն) և դե-յուրե (իրավաբանորեն) տարածքները: Իրավական տեսանկյունից Ղարաբաղը «պատկանում» է Ադրբեջանին, բայց քանի որ արդեն 20 տարի շարունակ այն վերահսկվում է Հայաստանի կողմից, դրա համար էլ մենք այն ընդգրկել ենք վիճելի տարածքների թվում»:
Նշվում է, որ լատվիական հրատարակչատունը, Լեռնային Ղարաբաղի նման, վիճելի տարածքների շարքին է դասել նաև Աբխազիան, Հարավային Օսեթիան, Մերձդնեստրը և Հյուսիսային Կիպրոսը:
