Ուզում եմ Սերժ Սարգսյանին իր անցյալը հիշեցնեմ՝ նա անցյալ չունի: «Առաջին լրատվական»-ի հետ զրույցում այս մասին ասաց Մարտի մեկի զոհ Գոռ Քլոյանի հայրը՝ Սարգիս Քլոյանն՝ անդրադառնալով ՀՀ գործող նախագահ Սերժ Սարգսյանի՝ «Ազատություն» ռադիոկայանին տված հարցազրույցին:
Նա նշեց, որ քանի որ Սերժ Սարգսյանը խոսում է նախագահի անցյալից, ցանկություն հայտնեց հիշեցնել գործող նախագահի անցյալը: «Երբ նա Ազգային անվտանգության ծառայության ղեկավարն էր, մտան խորհրդարան և գնդակահարեցին ժամանակի իշխանությանը, Սուրեն Աբրահամյանը հրաժարական տվեց, իսկ նա՝ ոչ: 2008 թ. մարտի մեկին գնդակահարեցին սեփական ժողովրդին, նա ոչինչ չարեց, ստանձնեց նախագահի պաշտոնը: 5 տարվա ընթացքում ոչինչ չանելով՝ դատարկեց Հայաստանը: Մեր երեխաների մահվան քառասունքի օրը հայ ազգը լաց էր լինում, նա քոչարի էր պարում Հանրապետության հրապարակում: Կռվել է Ղարաբաղում, բայց ավելի լավ կռվողներ էլ կային, ովքեր Հայաստանում չեն այսօր, ովքեր էլ, որ մնացել են, սովի են մատնված: Ինքն անցյալ չունի, միայն կռվել է Ղարաբաղում»,- նշեց Սարգիս Քլոյանը:
Անդրադառնալով հարցազրույցի Մարտի 1-ի ողբերգական իրադարձություններին առնչվող հատվածին՝ նա ցավով հիշեց, որ իր աչքով է տեսել այդ իրադարձությունները, ինչով էր մեղավոր ժողովուրդը, տասը օր խաղաղ ցույց անցկացրած ժողովուրդը: «Ընդդիմությո՞ւնն ինչ մեղավոր էր՝ իր գողացված ձայներն էր պահանջում, որ նորից ընտրության գնայինք, որ երկրորդ փուլ լիներ, ցանկանում էին վերադարձնել իրենց ձայները»,- ասաց Սարգիս Քլոյանը:
Հիշեցնենք, որ Սերժ Սարգսյանն իր հարցազրույցում նշել էր, որ բոլոր քաղաքական ուժերն իրենց պետք է պատասխանատու զգան երկրում կայունության համար, և իրենց պետք է պատասխանատու զգան նաև արդյունքների համար: «Ես կարծում եմ, որ ողբերգությունը տեղի է ունեցել, որովհետև բոլորս էլ մեղավոր ենք»,- նշել էր նախագահը: