Թուրքիայի պաշտպանական ընկերությունների արտահանումը 2012-ին, նախորդ տարվա համեմատ, աճել է 43 տոկոսով և կազմել 1.3 մլրդ դոլար: Այս մասին հայտնում է MK-Turkey կայքը:
Թուրք զինարտահանողների ասամբլեայի տրամադրած տեղեկության համաձայն՝ արտահանման եկամուտների մեծ մասը ստացվել է օդանավերի և ուղղաթիռների, ռեակտիվ շարժիչների և զրահատեխնիկայի պահեստամասերից:
Թուրքիայի ռազմարդյունաբերության արտադրանքների գլխավոր գնորդը ԱՄՆ-ն է, որն անցած տարի գնել է 490 մլն դոլարի զինտեխնիկա: Երկրորդ տեղում ԱՄԷ-ն է (101 մլն դոլար), իսկ երրորդ տեղը զբաղեցնում է Սաուդյան Արաբիան (99 մլն դոլար):
Թուրքիան զենք է վաճառում նաև Ռուսաստանին, Մեծ Բրիտանիային, Իտալիային, Գերմանիային, Ֆրանսիային և Իրաքին:
Ռազմական արտահանումից բացի` Թուրքիան 2012 թվականին հասել է ընդհանուր արտահանման ռեկորդային ցուցանիշի՝ 151.86 մլրդ դոլարի: