2013թ. հունվարի 19-ին Անկարայում տեղի է ունեցել Հրանտ Դինքի սպանության վեցերորդ տարելիցը ոգեկոչող ֆորում, որը կազմակերպվել էր «Մարդու Իրավունքների Միության» Անկարայի կենտրոնի, «Մտքի Ազատություն Նախաձեռնության» և տեղական այլ հասարակական կազմակերպությունների կողմից։
Թուրքիայի ականավոր մտավորականների մասնակցությամբ ֆորումի աշխատանքներին հրավիրվել էին նաև «Արևմտահայոց Ազգային Համագումար» միջազգային կազմակերպության ներկայացուցիչներ Կարեն Միքայելյանը (ԱԱՀ փոխնախագահ) և Սևակ Արծրունին (ԱԱՀ Խորհրդի անդամ, Թուրքիայի աշխատանքային խմբի համակարգող)։
Կարեն Միքայելյանն իր բացման խոսքում ողջունել է ֆորումի աշխատանքները և ներկայացրել Արևմտահայոց Ազգային Համագումարի նպատակներն ու ծրագրերը:
Տպավորիչ ելույթներով հանդես են եկել հանրաճանաչ մտավորականներ Իսմայել Պեշիկչին, Սաիդ Չեթինօղլուն, Ֆիքրեթ Բաշքայան և Բասքին Օրանը:
Իսմայել Պեշիկչին, ով Հրանտ Դինքի գնահատմամբ Թուրքիայում Հայոց ցեղասպանության խնդրի առաջին հրապարակայնորեն բարձրաձայնողն է եղել, մասնավորապես հայտարարել է, որ Թուրքիայում հայության և մյուս ժողովուրդների վերացմամբ բնաջնջվեց հազարամյա Մերձավոր Արևելքը, և որ այս պատմական անկյունադարձային փաստը հարկավոր է հետազոտել և գնահատել:
Սաիդ Չեթինօղլուն կոչ է ուղղել Թուրքիայի մտավորականներին և հանրությանը հետազոտել և գնահատել նախնիների դերակատարությունից առաջ եկած սեփական պատասխանատվության չափը Հայոց ցեղասպանության և հայ ու մնացած ոչ իսլամ փոքրամասնությունների նկատմամբ իրականացված կողոպուտի հարցում: Պրն Չեթինօղլուն նաև հայտարարեց, որ 1915 թվականի դեպքերը հարկավոր է ճիշտ գնահատել, քանի որ իր կարծիքով ժամանակակից Թուրքիան ստեղծվել է հենց 1915 թվականին:
Բասքին Օրանը իր ելույթում առաջարկել է ներկաներին գիտակցելու, որ 1915-ից հետո ծնված լինելու արդարացումը իսկապես չի գործում, ինչպես նաև շեշտեց համատեղ ապագա կերտելու անհրաժեշտությունը:
Սևակ Արծրունին, խոսքն ուղղելով Թուրքիայի ազատատենչ մտավորականներին, հիմնականում շեշտը դրել է Հայոց ցեղասպանության պատճառած վնասների և հայության իրավունքների վերականգնման ծրագրերի անհրաժեշտության վրա:
Ելույթ է ունեցել նաև ԱՄՆ-ից ժամանած «Արմինիան Վիքլի»-ի խմբագիր Խաչիկ Մուրադյանը:
Ֆորումի մասնակիցների վրա մեծ տպավորություն են գործել «Մարդու Իրավունքների Միության» Ստամբուլի գրասենյակի անդամ Հրանդ Գասպարեանի և ակտիվիստ Թայֆուն Իշչիի ելույթները: Հրանդ Գասպարեանը խոսեց Թուրքիայում հայ լիենլու առ այսօր դժվարագույն իրողության մասին: Թայֆուն Իշչին ներկաներին հարց ուղղեց Թուրքիայի բնակչության ինքնության մասին և հայտարարեց, որ ինքն էլ «հայ ժողովրդի զավակների կողոպտված գույքից» մի օրինակ է, քանի որ հայրը առևանգվել և իսլամացվել է իր ընտանիքը կոտորած մարդկանց կողմից:
Ֆորումի ավարտից հետո բոլոր ներկաները մասնակցել են դեպի Անկարայի «Հաղթանակ»-ի հրապարակ երթին՝ Թուրքիայի պետությունից պահանջելով Հրանտ Դինքի սպանության գործով ճշմարտության անհապաղ բացահայտումը:
