CnnTürk-ի փոխանցմամբ, այսօր Թուրքիայի արևելյան ու հարավարևելյան քրդաբնակ շրջաններում մի շարք բախումներ են գրանցվել քրդերի ու թուրքերի միջև:
Թուրքիայի հարավարևելյան Հաքքարի նահանգի Չուքուրջա շրջանում թուրքական զինվորական շարասյունն ընկել է քրդական ծուղակի մեջ` հայտնվելով ականապատ տարածքում: Ականի պայթյունից վիրավորվել է մեկ թուրք զինվոր:
Մեկ այլ բախում գրանցվել է դարձյալ Թուրքիայի հարավարևելյան հատվածում: Շըրնաքի մարզի Իդիլ նահանգում Ժանդարմերիայի պարեկություն կատարող խումբն է հայտնվել ականապատ տարածքում: Ականի պայթելու հետևանքով վիրավորվել է Ժանդարմերիայի 2 սպա և 4 սերժանտ:
Երրորդ բախումը գրանցվել է գիշերը Թունջելիից (Դերսիմ) 14 կիլոմետր հեռավորության վրա ընկած Գյոքչեք գյուղում: Այստեղ քուրդ զինյալները հեռահար զենքերով գնդակոծել են Ժանդարմերիայի պարեկային խմբին, ապա օգտվելով մառախուղից ու անձրևից` հեռացել դեպքի վայրից: Այս բախման արդյունքում զոհերի ու վիրավորների մասին ոչինչ չի նշվում:
Հիշեցնենք, որ նախապես հայտնի էր, որ այսօր թեժ օր է սպասվում թուրք զինվորականների ու անվտանգության աշխատակիցների համար, քանի որ այսօր լրանում է Մարմարա ծովի Իմրալը կղզում ցմահ բանտարկություն կրող, «Քրդստանի աշխատավորական» կուսակցության (PKK) հիմնադիր Աբդուլլահ Օջալանի ծննդյան 62-րդ տարեդարձը:
