Մարսի մակերեսին խոր իջվածքներն իրենց մեջ պարունակում են կավի հետքեր, որոնք ձևավորվում են միայն ստորգետնյա ջրերի առկայության պայմաններում, ինչը խոսում է այն մասին, որ կարմիր մոլորակի վրա կարող է գոյություն ունենալ հեղուկ ջուր և հետևաբար՝ նաև կյանք,- հաղորդում է Nature Geoscience-ը:
Համարվում է, որ Մարսի մակերևույթին հնագույն շրջանում գոյություն են ունեցել օվկիանոսներ և գետեր: Կարմիր մոլորակի չափերն ու քաշը չափազանց փոքր են խիտ և մեծ մթնոլորտի պահպանության համար, որի հետևանքով ջուրը աստիճանաբար անհետացել է:
MRO (Mars Reconnaissance Orbiter) զոնդը 2000-ական թթ. երկրորդ կեսին հայտնաբերել է մեծ քանակությամբ կավի կուտակումներ, որոնց ներսում կան ջրի մոլեկուլներ: Այդ բացահայտումը համարել են վկայություն՝ հօգուտ Մարսի վրա ջրի գոյության:
Ջոզեֆ Միխալսկիի ղեկավարությամբ աստղագետների մի խումբ վկայություն է հայտնաբերել այն մասին, որ Մարսի վրա ջրերի անհետացումից հետո որոշ իջվածքներում, այնուամենայնիվ, ջուր գոյություն է ունեցել:
Հոդվածի հեղինակները նոր աշխատանքում ուշադրություն են դարձրել կավի կուտակումների վրա, որը եղել է Մաքլաֆլին իջվածքում: Աստղագետները նկատել են, որ այդ կավը, դատելով MRO-ի տվյալներից, իր մեջ պարունակել է մագնեզիումի և երկաթի աղեր: Նման նյութերը չեն կարող ձևավորվել առանց ջրի մոլեկուլների, ինչը վկայում է Մարսի վրա գտնվող կավի «ջրային հիմքի» մասին:
