Մի «չկան»՝ հազար հարցի պատասխան: Հավանաբար այսպես է մտածել ՀՀ նախագահի թեկնածու Արման Մելիքյանը՝ լրացնելով Կենտրոնական ընտրական հանձնաժողով ներկայացվելիք իր հայտարարագիրը: Որպես հաշվառման վայր նշելով Երևանի Հալաբյան փողոցում գտնվող բնակարանը, իսկ որպես բնակության վայր՝ Բրյուսովի փողոցի բնակարանը, Մելիքյանը որպես սեփականություն չի հայտարարագրել ոչ մի անշարժ կամ շարժական գույք, ոչ մի գրոշ եկամուտ և ոչ մի այլ բան, բացի բանկային հաշեհամարի 440 հզ. դրամից: Թե այս գումարը Մելիքյանին որտեղի՞ց, դա էլ բացատրության կարիք ունի:
Իսկ որպես աշխատավայր և պաշտոն Ա.Մելիքյանը նշել է «Փախստականները և միջազգային իրավունքը» քաղաքացիական հասարակության ցանցի քաղաքական հարցերով խորհրդատու՝ հասարակական հիմունքներով: Այսինքն` ընտանիքի տեր տղամարդը, որը հավակնում է ղեկավարել Հայաստանի Հանրապետությունը, զբաղված է զուտ բարեգործությամբ՝ խորհուրդներ է տալիս կարիքավորներին ու չի հոգում անգամ իր «գրպանի գումարը» վաստակելու մասին… Եթե իհարկե հավատանք հայտարարագրին: