2011 թ. դեկտեմբերին կհրապարակվի «Հայաստանի երիտասարդության ազգային զեկույցը», որում տեղ կգտնեն երիտասարդական պետական քաղաքականության զարգացման նպատակով իրականացվող համապարփակ ուսումնասիրությունների արդյունքները: Այն վերաբերելու է 18-30 տարեկան բոլոր քաղաքացիներին հուզող հարցերին: Այդ մասին կառավարության մամուլի կենտրոնում այսօր հայտարարել է ՀՀ սպորտի և երիտասարդության հարցերի նախարարի տեղակալ Արսեն Քարամյանը:
Ըստ բանախոսի` նման զեկույցի հրապարակման հաջող փորձ եղել է 2006-2007 թվականներին: «Բոլորս հասկանում ենք, որ հինգ տարվա ընթացքում էական փոփոխություններ են տեղի ունեցել մեզ շրջապատող աշխարհում, և, բնականաբար, երիտասարդներին հուզող խնդիրներն էլ որոշակի տրանսֆորմացիայի են ենթարկվել»,- նշել է Արսեն Քարամյանը: Խոսելով ոլորտում առկա խնդիրների մասին` նախարարի տեղակալը առանձնացրել է երիտասարդության մասին թվային ու բովանդակային վիճակագրության բացակայության հարցը:
Ասուլիսի ընթացքում խոսվել է այն երեք հիմնական ուղղությունների մասին, որոնց շուրջ իրականցվելու են ուսումնասիրությունները՝ որակյալ և մատչելի կրթության կազմակերպումը, երիտասարդության զբաղվածության խնդիրը, առողջության և հատկապես վերարտադրողակ առողջության խնդիրները: Ուսումնասիրությունը մեկնարկելու է մայիսից ամբողջ հանրապետության տարածքում և տևելու է մինչև հոկտեմբերի վերջը: Դեկտեմբերի երկրորդ կեսին զեկույցը հրապարակվելու է հայերենով, իսկ 2012 հունվար-փետրվար ամիսներին` անգլերենով:
Արսեն Քարամյանը անդրադարձել է նաև երիտասարդության մասին օրենքին` նշելով, որ հանրապետության վարչապետի նախաձեռնությամբ Ազգային ժողովից հետ է կանչվել երիտասարդության մասին օրենքի նախագիծը` լրամշակման համար: Նրա խոսքով` նշված զեկույցը օգնելու է, որպեսզի կառավարությունը Ազգային ժողովում հանդես գա օրենքի շատ ավելի իրատեսական նախագծով, այն կլինի առարկայական ու իսկապես ուղղված կլինի ոլորտի բարելավմանը:
