Գեղարքունիքի մարզի ընդհանուր իրավասության դատարանում Յուրիկ Իսկոյանի նախագահությամբ ավարտվել է Գրետա Գ.-ի (անունը փոխված է) գործի դատական քննությունը:
Ըստ մեղադրանքի՝ 21-ամյա Գրետայի ամուսնուն՝ Վլադիմիրին, 2014 թվականի հուլիսի 31-ի կեսգիշերին ծեծել է վերջինիս ծանոթ Վոլոդյան:
«Վալոդից» վրեժխնդիր լինելու նպատակով, գիտակցելով, որ իր հաղորդած տեղեկությունը կեղծ է, անձնազոհ Գրետան նույն օրը ոստիկանությունում գրավոր հաղորդում է տվել, թե այդ Վոլոդյան, բռնություն գործադրելով իր նկատմամբ, կեսգիշերին իրենց տան բակից իրեն քաշելով տարել է փողոց, հրել, գցել է գետնին ու փորձել է իր կամքին հակառակ սեռական հարաբերություն ունենալ իր հետ:
Գրետա Գ.-ին մեղադրանք է առաջադրվել սուտ մատնության համար՝ ՀՀ քրեական օրենսգրքի 333 հոդվածի 2-րդ մասի 1-ին կետով:
Ըստ դատական ակտի՝ Վոլոդյան 2013 թվականից ճանաչել է Գրետայի ամուսին Վլադիմիրին ու վերջինիս մորաքրոջը, ով Վլադիմիր համար, նրա ծնողների մահից հետո, ծնողի նման է եղել:
Վոլոդյան Վլադիմիրի մորաքրոջը ճանաչել է «Սուր անկյուն» հաղորդումից հետո, նրա ու Վլադիմիրի հետ եղել է լավ հարաբերությունների մեջ, հաճախ այցելել է նրանց տուն:
2014 թվականի հուլիսի 30-ին Վոլոդյան համագյուղացի Մարզպետի հետ գնացել է գնումներ կատարելու: Գնումներից հետո որոշել են այցելել Վլադիմիրի մորաքրոջը:
Վլադիմիրը ջերմորեն ընդունել է հյուրերին: Մորաքույրն իր չորս երեխաների հետ տանը չի եղել, Երևանում էր մեկնել: Վլադիմիրը հյուրասիրել է հյուրերին:
Վերջիններս այդ տանը տեսել են Գրետային, ում ճանաչել են, երբ վերջինս աշխատել է Մարտունիում: Վլադիմիրը հյուրերին ասել է, թե ինքը Գրետայի հետ ամուսնացել է:
Հյուրերը հյուրասիրվել են, օղի են խմել: Բայց Վոլոդյան նկատել է, որ իրենց ներկայությունը կարծես թե Վլադիմիրին ու Գրետային առանձնապես հաճելի չէ:
Հյուրերը «բարի գիշեր» են ասել ու դուրս են եկել:
Վոլոդյան ընկերջն ասել է, որ նա մեքենայում սպասի, մինչև ինքը բնական կարիքները հոգա: Այդ կարիքները հոգալու ճամփին Վոլոդյան անցել է Վլադիմիրի բնակարանի մոտով ու լսել է, որ Վլադիմիրը Գրետայի հետ խոսելով՝ իր ու ընկերոջ հասցեին հայհոյանքներ է տալիս:
Վոլոդյան այդ հանգամանքից շատ է վիրավորվել, ներս է մտել ու Վլադիմիրին դուրս է հրավիրել:
«Վալոդն» ու Վլադիմիրը վիճել են հայհոյանքների վերաբերյալ: «Վալոդը» հարվածներ է հասցրել Վլադիմիրին, նրա ձախ ազդրի շրջանում քերծվածքներ է առաջացրել:
Վլադիմիրն էլ իր հերթին բռունցքներով խփել է Վոլոդյայի մարմնին, պարանոցի ու գոտկատեղի շրջանների քերծվածքներ է պատճառել:
Գրետան միջամտել է, ցանկացել է կռիվը դադարեցնել: «Վալոդը» հրել է Գրետային՝ ասելով, որ նա չխառնվի տղամարդկանց խոսակցությանը:
Գրետան շարունակել է «խանգարել» կռվողներին: «Վալոդը» բռնել է նրա շորից՝ տաբատի գոտկատեղից, քաշել է մի կողմ, որի ընթացքում, ըստ դատական ակտի, «պոկվել է տաբատի շղթան»:
Գրետան չի հեռացել: «Վալոդը» նորից հրել է նրան, ու Գրետան վայր է ընկել:
Վլադիմիրն այդ ընթացքում գնացել է տուն՝ կոշիկները հագնելու, իսկ «Վալոդն» ու Գրետան շարունակել են խոսակցությունը: «Վալոդը» Գրետային ասել է. «Խելոք մնա, թե չէ կտանեմ քո հայրական տուն»:
Գրետան ու «Վալոդը» նույնիսկ քաշքշել են իրար, մինչև որ արդեն կոշիկները հագած Վլադիմիրն օգնության է հասել կնոջը: Քաշքշոցը մի քիչ էլ շարունակվել ու դադարել է:
Հյուրերը հեռացել են, Վլադիմիրն ու Գրետան տուն են մտել:
Գրետան զանգել է ոստիկանություն, հաղորդում է տվել, թե Վոլոդյան ծեծել է իր ամուսնուն, հետո էլ իրեն քարշ է տվել փողոց ու փորձել է հենց փողոցում բռնաբարել:
Բռնաբարության փորձի համար քրեական գործ է հարուցվել, բայց նախաքննության ընթացքում հիմնավորվել է, որ նման փորձ չի կատարվել:
Հարուցված քրեական գործի վարույթը կարճվել է, սակայն նոր քրեական գործ է հարուցվել արդեն Գրետայի նկատմամբ՝ ծանր հանցագործության մեջ մարդուն սուտ մեղադրելու համար:
Ընդհանուր իրավասության դատարանում Գրետան իրեն մեղավոր է ճանաչել: Հայտնել է, թե Վլադիմիրի հետ փաստական ամուսնական հարաբերությունների մեջ է: Նա ասել է, թե դեպքի օրը հյուրերի գնալուց հետո ամուսնուն ասել է, որ նրանց հետ չի ցանկանում այլևս ոչ մի տեսակ շփում ունենալ: Հնարավոր է՝ ամուսինն էլ հայհոյանքներ հնչեցրած լինի հյուրերի հասցեին, քանի որ նրանց ներկայությունն իրենց համար ցանկալի չի եղել:
Դրանից հետո իրենք պառկել են քնելու, երբ Վոլոդյան հետ է եկել ու ամուսնուն դուրս կանչել:
Որոշ ժամանակ հետո ինքը լսել է ամուսնու և Վոլոդյայի վիճաբանության ձայները: Դուրս է եկել, տեսել է՝ նրանք իրար հարվածներ են հասցնում: Փորձել է միջամտե, Վոլոդյան քաշքշել է իրեն, այդ ժամանակ իր տաբատի շղթան պոկվել է:
Ինքը Վոլոդյայից վրեժխնդիր լինելու համար է սուտ հաղորդում տվել, թե նա փորձել է իրեն բռնաբարել:
Ամբաստանյալը զղջացել է, ասել է, թե սուտ մատնությունը կատարել է իր նախաձեռնությամբ, ոչ ոք դրա հետ կապ չունի:
Վոլոդյան հայտնել է, թե Գրետային հրել է, որովհետև նա անընդհատ միջամտել է իր ու ամուսնու վեճին: Ինքը հրել է, որ նա հեռու մնա տղամարդկանց պարզաբանման պահին, սակայն Գրետան «պոկ չի եկել ու ամբողջ ընթացքում անկանոն շարժումներ է արել»: Երևի այդ հրմշտոցի ժամանակ է պոկվել նրա տաբատի շղթան, ինքը դա չի նկատել:
Հետո զգացել է, որ եթե չհեռանա, ամեն բան ավելի կթեժանա, նստել է մեքենա ու ընկերոջ հետ հեռացել է: Հաջորդ օրն իրեն հրավիրել են ոստիկանություն, որտեղ իմացել է, որ Գրետան հաղորդում է տվել՝ իբր ինքը փորձել է նրան բռնաբարել: Նման բան ինքը չի արել:
Ընդհանուր իրավասության դատարանը Գրետային մեղավոր է ճանաչել ՀՀ քրեական օրենսգրքի 333 հոդվածի 2-րդ մասի 1-ին կետով, դատապարտել է 1 տարի ազատազրկման, ապա պայմանական դատապարտություն է կիրառել նրա նկատմամբ ու սահմանել է 1 տարի փորձաշրջան:
