«Կարծիք կա, որ իսլամական պետության ստեղծումն է Սիրիայում իրավիճակի լուծումը: Կան այլ տարբերակներ ևս, բայց դա ամենահավանականն է: Սակայն հնարավոր չի լինի Սիրիան պահպանել այն սահմաններում, որ գոյություն ունեն այսօր: Ընդդիմությունը չի կարողանա: Ընդդիմությունը պառակտված է, սկսվել են բախումներ՝ մեկը մյուսի դեմ: Մյուս կողմից, այն հակասությունները, որ դուրս եկան այս վերջին մեկ-երկու տարիներին ջրի երես, այնքան են խորացել, որ չեմ կարծում, թե ընդդիմության` իշխանության գալով` հնարավոր կլինի, օրինակ, բնակչության տասը տոկոս կազմող ալավիներին պահել մի պետության կազմում, որտեղ մեծամասնություն են սունիները: Կամ՝ քրդերին»,- Հանրային հեռուստաընկերության «Հարցազրույց» հաղորդման եթերում ասել է ՀՀ ԳԱԱ արևելագիտության ինստիտուտի տնօրեն Ռուբեն Սաֆրաստյանը:
Հայաստանի դիրքորոշումը, ըստ նրա, պետք է խարսխված լինի այն փաստի վրա, որ Սիրիայի խնդիրները պետք է լուծեն սիրիացիները, իրենք պետք է որոշեն իրենց ճակատագիրը, իսկ մեր գերագույն նպատակը պետք է լինի օգնել, որ մեր եղբայրներն ու քույրերը ապահով լինեն:
Վերջերս համացանցային ստորագրահավաք էր նախաձեռնվել` հայ-թուրքական սահմանը բացելու առաջարկով` սիրիահայերին օգնելու նպատակով: Այս առիթով Ռուբեն Սաֆրաստյանն ասել է, որ նախաձեռնությունն ի սկզբանե չուներ հաջողության հնարավորություն, եթե անգամ աջակցում է Ամերիկան, քանի որ չնայած ԱՄՆ ջանքերին՝ Թուրքիան շարունակում է իր քաղաքականությունը, փակ է պահում սահմանը և դրանով ճնշում հայերին: Թուրքիան, նրա խոսքերով, շահագրգռված չէ Հարավային Կովկասում ակտիվանալու: «Մոտ ապագայում Թուրքիայի կողմից որևէ դրական քայլ` Հայաստանի հետ հաբերությունների կարգավորման սպասելու վերաբերյալ, անիմաստ է: Արձանագրություններն իրենց սպառել են: Մեր դիվանագիտությունը հարցը այլ հարթության վրա պետք է դնի։ Երկու կողմերը պետք է հանդես գան, որ հաստատում են դիվանագիտական հարաբերություններ»:
Ռուբեն Սաֆրաստյանը նաև ասել է, որ մենք պետք է վերաիմաստավորենք մեր աշխարհաքաղաքական դիրքը, և չմոռանանք, որ մենք մերձավորարևելյան ժողովուրդ ենք:
Ընթացիկ տարին Սաֆրաստյանը մեր արտաքին քաղաքականության համար լարված է կանխորոշում. «Առաջինը Ադրբեջանն է, որ գնում է նախագահական ընտրությունների: Կլինեն ռազմատենչ հռետորաբանություն, սահմանի վրա լարվածության ուժեղացում նախագահական ընտրությունների օրերին: Սա վտանգավոր է, և պետք է կարողանանք սա հասցնել ԵԱՀԿ ՄԽ համանախագահներին: Պետք է չմոռանանք տարածաշրջանում լարվածությունը` կապված Իրանի հետ: Որոշ հրապարակումներ կան, որ Իսրայելը սպասում է Իրանի կողմից ուրանի հարստացման այն մակարդակին, որ կսկսի միջուկային զենքի ստեղծման փուլ լինել: Ես կասկածում եմ այս տվյալներին: Այնտեղ ընդամենը ուրանի հարստացում է: ԱՄՆ-ում 2014 թիվն են համարում: Հնարավոր է՝ որևէ կողմից հարված հասցվի Իրանի միջուկային հարստացման գործարաններին, իսկ դա նշանակում է լարվածության ուժեղացում, անգամ՝ ռազմական գործողություններ: Այս ընթացքում Ադրբեջանը կփորձի օգտվել և ռազմական ճանապարհով լուծել Ղարաբաղի հարցը»:
