Մալաթիա-Սեբաստիա համայնքում երկու սենյականոց, պետական վիճակում գտնվող բնակարանի վարձակալությունը դեռ ամռան պիկ շրջանում, երբ ուսանողները վարձով տներ էին փնտրում, արժեր 60-70 հազար կամ առավելագույնը 80 հազար դրամ: Վերջին օրերին ֆինանսական անկայունությունը, պարզվում է, ազդել է նաև անշարժ գույքի շուկայի վրա, մասնավորապես՝ վարձակալության գների:
Բնակարանների վարձակալության գներն այս պահին մոտ 20-30 հազար դրամով թանկացել են: Շատ հնարավոր է, որ այս գները չնվազեն այն պատճառով, որ մարդիկ պարզապես այլընտրանք չունեն: Քիչ թե շատ վերանորոգված բնակարանների վարձակալության գները սկսվում են նախկին 100-ի փոխարեն 120 հազար դրամից, հետևաբար միջինից ցածր կամ միջին եկամուտներով ընտանիքները չեն կարող ամսական 120 հազար միայն բնակարանի վարձ վճարել: Ստացվում է՝ վարձավճարի 20-30 հազար դրամ թանկացումը ֆիքսվող թանկացում է հատկապես վերոնշյալ տարբերակի համար:
Անշարժ գույքի առքուվաճառքների հետ կապված վերջին օրերի վիճակագրությունը (աղբյուրը՝ estate.am, list.am) ցույց է տալիս, որ առաջարկները դրամայինից փոխվել են դոլարայինի: Ինչը ևս մեկ անգամ փաստում է, որ ստեղծված իրավիճակից ուզում են օգտվել բոլորը:
Թանկացումների միտումը հնարավոր է շարունակվի նաև 2015-ին, քանի որ հասարակության լայն շրջանակների համար հիպոթեքային վարկերի պայմանների անհասանելիությունը վարձակալության հանդեպ պահանջարկը կայուն է պահում:
