Հայկական գինին ռուսական շուկայում ոչ թե շահի խնդիր ունի, այլ իրեն արժեզրկումից փրկելու: Տեղացի արտադրողներն իրենց գինին այս օրերին ռուսաստանյան շուկայում իրացնում են փոխանակման տարբերակով: Գինեգործների միության նախագահ Ավագ Հարությունյանը «Առաջին լրատվական»-ի հետ զրույցում տեղեկացրեց, որ գինու դիմաց հայ արտադրողները ստանում են հրուշակեղեն, տախտակ, մետաղ և այլն:
«Բանավոր, ոչ պաշտոնական տեղեկատվությամբ՝ փոխանակման համար չհաստատված որոշ ապրանքների ցանկ կա: Դրանք այն ապրանքներն են, որոնք մեր շուկայում մոնոպոլ են, բացի դրանից՝ բյուջեի ներմուծման մասով արդեն հաշվարկված»,- հայտնեց միության նախագահը:
Ռուսաստանը, ֆինանսական շուկայի կոլապսով պայմանավորված, սկսել է գնաճը զսպող «կոշտ» քաղաքականություն վարել: Այս պայմաններում տեղացի գինեգործներն իրենց արտադրանքը չեն կարող վաճառել այս շուկայում և եկամուտներ ստանալ, ահա թե ինչու են անցել բարտերային տարբերակին:
Նշենք, որ այս պահին հայկական գինու հիմնական շուկան՝ մոտ 70 տոկոսը բաժին է ընկնում Ռուսաստանին, մնացած 30 տոկոսը՝ Չինաստանին, Արևելյան Եվրոպայի երկրներին, քիչ քանակությամբ՝ Կանադային և այլ երկրների: Հայ գինեգործները նոր շուկաներ գտնելու հարցում բազմիցս նշել են, որ այս հարցում իրենք պետության աջակցության կարիքն ունեն:
Տեղական գինին ռուսական շուկայում բազմիցս ունեցել է ծանր շրջաններ՝ 98-ին, 93-94-ին, և բոլոր այս իրավիճակներում հայ տնտեսվարողները չեն հասկացել, որ այս շուկան իրենց արտադրանքի համար հուսալի չէ: Ցավոք, գրեթե բոլոր ընկերություններն այսօր նայում են դեպի ռուսական շուկա:
Սրան զուգահեռ, «Գոլդեն Գրեյփ ԱրմԱս» գինեգործական ընկերությունն իր գինիները մոտ 1 տարի առաջ սկսել է Հայաստանից արտահանել այլ աշխարհագրությամբ՝ հիմնական շուկաներ ընտրելով են ԱՄՆ-ը, Լիտվան, Գերմանիան և այլ երկրներ:
«Այս երկրներում մեր գինիների հանդեպ մեծ հետաքրքրություն կա, օրինակ՝ Լոս Անջելեսում գինին հիմնականում իրացվում է հայկական սփյուռքի շրջանակներում: Գերմանիայում մեր վաճառքը լինելու է օնլայն, հույս ունենք, որ եվրոպական այլ երկրներ էլ կներգրավենք: Մեզ համար թիրախային շուկա է նաև Չինաստանը»,- նշեց ընկերության տնօրենի օգնական Մանուշակ Միքայելյանը՝ ավելացնելով, որ ռուսական շուկայում ներկայացուցչություն դեռ չունեն:
Հայկական գինու հանդեպ պահանջարկը տարբեր երկրների շուկաների կողմից տարբեր է: Եթե ռուսական շուկայում մեր գինին, ըստ Հարությունյանի, 15-20 տոկոս պահուստային տեղ ունի վրացական գինու դիրքի պատճառով, ապա Չինաստանն ու Արևելյան Եվրոպան այլ նշաձող ունեն: Այս երկրները միջին և բարձր գնի գինու պահանջարկ ունեն:
«Գինեգործների միության» նախագահը մեզ հետ զրույցում շեշտեց, որ ստեղծված իրավիճակը ինչ-որ առումով նաև տեղացի արտադրողների համար այլընտրանքային շուկաների մասին լրջորեն մտածելու առիթ է տալիս:
«Մենք երկու հիմնական շուկա ունենք. մեկը բարեկամական շուկան է՝ սփյուռքը, մյուսը՝ սփյուռքի մեծ ազդեցությամբ շուկան է՝ Կանադա, Սկանդինավյան երկրներ և այլն: Պետությունն իր դիվանագիտական կապերով պետք է օգնի ճանապարհ հարթել նոր շուկաներ գրավելու համար»,- նշեց նա:
Մյուս կողմից՝ ռուբլու կտրուկ արժեզրկման հետևանքով վնասները մեղմելու համար արտադրողները նվազեցնում են դեպի Ռուսաստան արտահանման ծավալները: Չնայած նրան, որ 2013-ին, ի տարբերություն 2012-ի, դեպի Ռուսաստան գինու արտահանման ծավալներն աճել էին 27.6 տոկոսով և դարձել 1 մլն 228 հազար 600 լիտր՝ 962 հազար 600 լիտրի փոխարեն:
2014թ. վիճակագրական գնահատականը դեռ չկա, իսկ 2015-ի կանխատեսումը, ըստ Հարությունյանի, կախված է ոչ թե փոխարժեքի, այլ իրավիճակի կայունացումից:
Լուսանկարը՝ Armenpress-ի
