Ալժիրի բանակի ստորաբաժանումները ներկա պահին հետապնդում են ավիացիայի հարվածներից փրկված գրոհայիններին, ովքեր առևանգել էին Սահարայի գազային համալիրի տեղական և արտասահմանյան մասնագետներին: Այս մասին տեղեկացնում է ալժիրական «Ան-Նախար» հեռուստաալիքը: Նրա տվյալներով՝ բանակը ամբողջովին վերահսկում է արտադրության բնակելի համալիրը:
Ազատ արձակված չորս գերիներից երկուսը բրիտանացի, մեկը ֆրանսիացի և մեկը քենիացի են, տեղեկացնում է APS գործակալությունը:
Գրոհայինների կողմից պատանդ պահվող գազային համալիրի աշխատակիցների ճակատագրի վերաբերյալ ավելի վաղ հակառակ տեղեկատվություն է տվել մավրիտանյան ANI գործակալությունը՝ հղում կատարելով գրոհայինների ներկայացուցչին. ռազմական ուղղաթիռների հարձակման արդյունքում զոհվել է 34 պատանդ, այդ թվում՝ արտասահմանցիներ, զոհվել է նաև 15 գրոհային: Նրա խոսքերով՝ ծրագրավորվում էր գերիներին ավելի ապահով վայր տեղափոխել, սակայն մեքենաները գնդակոծվել են ավիացիայի կողմից: Ահաբեկիչը խոստացել է նաև գործի դնել փրկված պատանդներին ամրացված պայթուցիկը, եթե ալժիրական բանակը փորձի մոտենալ նրանց: Հայտնի է, որ ոչնչացված իսլամիստների խմբում է նաև նրանց առաջնորդը՝ Աբու Բարաան:
Ավելի ուշ նույն ներկայացուցիչը տեղեկացրել է, որ յոթ արևմտյան պատանդներ՝ երեք բելգիացիներ, երկու ամերիկացիներ, մեկ բրիտանացի և մեկ ճապոնացի դեռ ողջ են և գտնվում են իր ընկերների ձեռքերում: «Նրանց հաջողվել է փրկվել ալժիրական բանակի ավիահարձակումից»,- ասել է նա՝ կոչ անելով նավթային ընկերությանը «օգնություն ցուցաբերել վիրավոր գերիներին»:
Մինչդեռ, ինչպես տեղեկացնում է Reuters գործակալությունը, հղում կատարելով տեղական աղբյուրներին, օդային հարձակման զոհ են դարձել վեց արտասահմանցիներ և ութ առևանգողներ, 180 պատանդների հաջողվել է փախչել իսլամիստների գերությունից: Բանակը ազատել է երկու բրիտանացիների, մեկ քենիացու և մեկ ֆրանսիացու:
Գերիներին առևանգած ալժիրցիները իշխանություններից պահանջել են Ֆրանսիային Մալի թռչելու համար օդային տարածքներ չտրամադրել:
