Բրիտանացի դերասան Դոմինիկ Քուփերը, ով հայտնի է «Մամա Միա», «Սատանայի կրկնօրինակը», «Առաջին վրիժառու» և «Նախագահ Լինքոլն. վամպիրների որսորդ» ֆիլմերից, կմարմնավորի «Ջեյմս Բոնդի» հեղինակ Իեն Ֆլեմինգին Sky Atlantic հեռուստաալիքի նոր՝ չորս մասից բաղկացած ֆիլմում, որի գործողությունները ընթանում են Երկրորդ համաշխարհային պատերազմի տարիներին:
Չնայած արտաքնապես Դոմինիկ Քուփերը այնքան էլ նման չէ Ֆլեմինգին, սակայն «Ֆլեմինգ» աշխատանքային անվամբ ֆիլմում խոսքը գնում է գրողի ավելի վաղ տարիքի կյանքի պատմության մասին: Երկրորդ համաշխարհային պատերազմի տարիներին Ֆլեմինգը աշխատել է ռազմածովային հետախուզությունում, որտեղ նա հայտնվել է բանկիրի անհաջող կարերայից հետո: Հենց այդ փորձը ավելի ուշ ոգեշնչեց գրողին ստեղծել 007 գործակալի կերպարը:
Ֆլեմինգի առաջին՝ «Խաղատուն Ռոյալ» ստեղծագործությունը, հրատարակվել է 1953թ-ին: Ֆլեմինգը իր կերպարին տվել է նաև սեփական բնավորության գծերը: Գրողը հասարակությունում հայտնի էր որպես կնամոլ և ալկոհոլի սիրահար: Հենց Քուփերը նշել է, որ «մարմնավորել Ֆլեմինգին, ով ոչ միայն ստեղծել է առեղծվածային Բոնդին, այլև անընդհատ պատկերացրել է իրեն նրա դերում, ցանկացած դերասանի երազանք է»: Հեռուստաֆիլմի նկարահանումները կսկսվեն այս տարի և կընթանան Մեծ Բրիտանիայում ու Հունգարիայում:
