«Ժողովրդավարական հայրենիք» կուսակցության նախագահ Պետրոս Մակեյանը նախագահական ընտրություններին չմասնակցելու և որևէ թեկնածուի չսատարելու ՀԱԿ հայտարարությունն իրենց կուսակցության համար համարում է անընդունելի, միաժամանակ ընդունում է, որ նշյալ որոշման կայացման ժամանակ իրենց կուսակցության փոխնախագահն իրեն ճիշտ չի դրսևորել:
«Ոչ ոք չի կարող չընդունել, որ մինչև 2011 թ. երկխոսությունը Կոնգրեսը լրջագույն ուժ էր, թելադրում էր լրջագույն քաղաքական օրակարգ, ամիսը երկու անգամ հանրահավաք էր անում, փորձում էր արտահերթ ընտրությունների ճանապարհով կազմաքանդել իշխանական բուրգը, բայց եկան ընտրությունները, և մենք դիտորդի կարգավիճակում ենք: Մենք բարձրաձայնել ենք արդեն մեկ տարուց ավելի, որ դա սխալ է Կոնգրեսի կողմից: Ներսում` քաղխորհրդում մեզ քարկոծում էին՝ որ չգիտեք, մի խագարեք: Ես հոկտեմբերի կեսերից լրատվամիջոցների համար անհասանելի եմ եղել, որպեսզի չխոչընդոտեմ Կոնգրեսի և ԲՀԿ-ի «սիրախաղերին»: Երբ հայտնի դարձավ, որ երկուսն էլ չեն առաջադրվում, ես նոր հասանելի եմ եղել: Այն, ինչ ես հապարակային ասում եմ, տասնապատիկ ասել եմ Կոնգրեսի քաղխորհրդում»,- «Երկիր Մեդիա» հեռուստաընկերության «Երկրի հարցը» հաղորդման եթերում ասել է Պետրոս Մակեյանը:
Նրա խոսքերով՝ դեռ մայիսից հայտարարել են, որ իշխանական բուրգը կազմաքանդելու փոխարեն քանդվում է Կոնգրեսը. «Լսում էին օլիմպիական սառնասրտությամբ: Մենք առաջարկում էինք, որ ընդդիմությունը, առաջին հերթին ՀԱԿ-ը պետք է ուժային կենտրոն ձևավորի և կազմաքանդի այս համակարգը: Հրապարակային ասել եմ ավելի քիչ, քան Կոնգրեսի ներսում: Կոնգրեսի հայտարարությունն ինձ համար անհասկանալի է. ավագանու ընտրությանը մասնակցել, Աժ ընտրությանը մասնակցել, սրան չմասնակցել, աբսուրդ է»:
Լևոն Տեր-Պետրոսյանի հայտարարությունից Պետրոս Մակեյանը հասկացել է, որ ՀԱԿ ղեկավարը հրապարակային քաղաքականությունը թողնում է, բայց քաղաքականությունից դուրս չի մնում: Սակայն պետք է նա «հավաքեր իր թիմին և բերեր իր արգումենտները»:
ՀԱԿ-ի բարեփոխման վերաբերյալ ևս «Ժողովրդավարական հայրենիք»-ը տասնյակ առաջարկություններ է ներկայացրել, Լևոն Տեր-Պետրոսյանին ահազանգել, որ լինելով ընտրությունները վերահսկող «միասնական շտաբի» մեջ` ԲՀԿ-ն ամենաշատ ընտրակաշառք բաժանողն է: Բայց արդյունք չեն ունեցել: Անգամ տեղյակ չեն եղել մանդատները վերցնելու ՀԱԿ որոշմանը: Այժմ էլ ի մի են բերել բոլոր առաջարկությունները և պատրաստվում է ներկայացնել ՀԱԿ անդամ բոլոր կուսակցություններին, ապա` ՀԱԿ քաղխորհրդին: «Կոնգրեսը եղել է հզոր ուժ, այսօր լուսանցքից դուրս է մղում: Կոնգրեսի քաղաքական մարմինը չքննարկի՞ ինչպես հայտնվեց այս վիճակում: Երբ քննարկի, կլինեն լուծումներ: Բայց եթե սա համարում են նորմալ, ուրեմն աբսուրդ է: Ոմանք օլիմպիականի սառնասրտությամբ իրենց այնպես են պահում, ասես ոչինչ չի եղել: Մենք աջակցել ենք այս իշխանության լեգիտիմացմանն ու վերարտադրմանը»,- ասել է Պետրոս Մակեյանն ու հավելել, որ երբեք այսպիսի տխուր նախագահական ընտրություն չի եղել, միշտ եղել է այլընտրանքային ուժային կենտրոն, որին վստահել է հասարակությունը: Իսկ այս անգամ դաշտը փակելով` ՀԱԿ-ը չթողեց նոր կենտրոն ստեղծվի:
«Կոնգրեսին հաջողվեց կազմաքանդել ինքն իրեն` իր ոճով, պահվածքով, իր ունեցած ջահելներով: Մարդիկ գնացել են, պատերազմի մասնակցել, բանտ նստել, ու հանկարծ մի փոքր շեղում Կոնգրեսի գծից, համարվում են դավաճաններ: Մենք փորձում ենք Կոնգրեսը փրկել, ինչ-որ մնացել է: Կոնգրեսը կոմայի եջ է, և եթե մեր առաջարկություններն ի մի բերենք, կարող է փրկենք, եթե ոչ, էլ դուրս գալու հարց չի լինելու»,- ասել է Պետրոս Մակեյանը` կրկին պնդելով, որ ՀԱԿ-ի խնդիրները սկսվեցին իշխանության հետ երկխոսության գնալուց:
