Թոմ Կրուզը պատրաստվում է փրկել մոլորակն այլմոլորակայիններից, բայց ոչ թե կինոյում, այլ իրական կյանքում: Դերասանի աշխատանքը խամրում է միլիարդ տարով Սայենթոլոգիայի եկեղեցուն ծառայելու նրա ստորագրած պայմանագրի համեմատությամբ, հայտնում է fedpost.ru-ն:
Այս ամենը հաստատում է «Գաղտնի ամեն ինչը բացահայտվում է. Սայենթոլոգիան, Հոլիվուդը և Հավատի Բանտը» գիրքը, որն ԱՄՆ-ում պայթած ռումբի ազդեցություն է ունեցել: Գրքի հեղինակ նյույորքցի գրող Լոուրենս Ռայթը գրում է, որ Եկեղեցին Կրուզին շնորհել է կենդանի աստծո կարգավիճակ, որը պետք է աշխարհը փրկի մարդկային մարմիններում ապրող օտարներից, Մոլորակը փրկի այլմոլորակայինների ներխուժումից:
Կրուզը Սայենթոլոգիայի հետևորդ է դարձել 23 տարեկանում, շարժմանը նրան միացրել է նախկին կինը՝ դերասանուհի Միմի Ռոջերսը: Սայենթոլոգիան Կրուզին միանգամից է գրավել, բայց շարժման մեջ նա ընդգրկվել է աստիճանաբար:
Եկեղեցու առաջնորդներից մի քանի տարի է պահանջվել, որպեսզի իրենց շարքերը ներգրավեն հայտնիների, նրանց թվում՝ Ջոն Տրավոլտային, Պրիսցիլլա Փրեսլիին, Սոնի Բոնոյին:
Գրքում բացահայտվում են շատ փաստեր, որոնք Եկեղեցին կտրականապես մերժում է, ինչպես, օրինակ, այն, որ մեղք գործած անդամներին կարող են ստիպել զուգարաններ մաքրել միայն լեզվով: Իսկ Թոմ Կրուզը շարունակում է կարևոր տեղ զբաղեցնել սայենթոլոգիայում, որն էլ, իր հերթին, կարևոր տեղ է զբաղեցնում նրա կյանքում:
