«Առաջին լրատվականը» հերթական անգամ շրջայց է կատարել երևանյան խանութներում և արձանագրել գնաճի հերթական դրսևորումները: Խանութներից գնումներ կատարած քաղաքացիները ամենաշատը դժգոհում էին հացի ու կաթնամթերքի թանկացումներից: Նշենք, որ հացը թնակացել է 20-30, իսկ որոշ հացատեսակների դեպքում՝ անգամ 40 դրամով: Թանկացել են նաև թթվասերը, պանիրը, կարագը, մածունը, կաթնաշոռը, յուղերի տեսականին և բազմաթիվ այլ առաջին անհրաժեշտության ապրանքներ:
Ուշագրավ է, որ մեր նախկին շրջայցի ժամանակ թանկացած ապրանքների գերակշիռ մասը ներմուծված ապրանքներն էին, իսկ այսօր արդեն ներմուծված ապրանքներին հավասար թանկացել են նաև տեղական արտադրության ապրանքները՝ մակարոնը, պանրի տեղական տեսականին, տոմատները, պահածոները և այլ ապրանքներ:
«Էսպես ոնց կլինի, երեկ մտա խանութ, 2 հատ 150-դրամանոց հաց առա, 300 դրամ տվեցի, բայց վաճառողն ասաց՝ պապի ջան, 40 դրամ էլ ավելացրու: Ու ամեն ինչն ա էդպես. վերջին օրերին ինչ առնում եմ, ասում են՝ ավելացրու, պապի ջան»,-դժգոհեց մի քաղաքացի:
«Ես գոնե նախկինում կարողանում էի 1 կիլոգրամ միս գնել, բայց հիմա, փաստորեն, պետք է ուտեմ ոսպ կամ ցորեն: Եվ դա նորմա՞լ եք համարում»,- բորբոքված արտահայտվեց մեկ այլ քաղաքացի:
«Եթե ամեն տեղ դոլարի ու եվրոյի կուրսը բարձրանում է, թանկացումը բնականը է: Բայց այստեղ դա չի կարևորը, կարևորը կուրսի իջնելուց հետո գների չնվազելն է: Հիմա բենզինը դարձել է 480-500 դրամ, դոլարը կիջնի 400 դրամ, բայց բենզինը այդպես էլ կմնա նույն գնին: Նույնն էլ սննդամթերքի դեպքում է: Այնքան ապրանք կա, որ այստեղ է արտադրվում, բայց գինն անսպասելիորեն բարձրացել է: Վերահսկողություն չկա՞ էս երկրում, չեմ հասկանում»,- ասաց դժգոհող քաղաքացիներից մեկը:
Խանութներում վաճառողները ոչ տեսախցիկի առջև մի մեկնաբանություն էին տալիս՝ թանկացումը կապված է դոլարի հետ, իսկ հարցին՝ ինչո՞ւ է ապրանքների թանկացումն անհամաչափ դոլարի թանկացման հետ, պատասխանում էին՝ արտադրողներին ու առաքիչներին հարցրեք:
