«Ի սկզբանե անհաջողության դատապարտված կառավարություն էր` երբեք թիմ չէր, միասնական ձգտումներ ու ծրագրեր չունեցող, մի օր մեկ բան ասող, հաջորդ օրը հակառակն անող, բանավոր ասող, գործնականում քայլ չանող»,- «Առաջին լրատվականի» հետ զրույցում այսօր ասաց ԿԲ նախկին նախագահ Բագրատ Ասատրյանը` խոսելով այն մասին, թե գործող կառավարության շուրջ երեք տարվա աշխատանքը ինչ արդյունքներ է տվել:
«Գործունեության երեք տարիների ընթացքում ՀՀ-ում տնտեսությունն անկում ապրեց շուրջ 5%–ով, միջին տարեկան գնաճը կազմեց ավելի քան 7%, բնակչության մեկ շնչին բաժին ընկնող ՀՆԱ-ն 3.6հազար ԱՄՆ դոլարից, որը միջին զարգացվածության երկրի ցուցանիշ էր, նվազեց 2.9 հազար ԱՄՆ դոլարից ավելի ցածր մակարդակի, պետական պարտքը աճեց մոտ երկու անգամ, որի շնորհիվ Հայաստանի յուրաքանչյուր քաղաքացին ծնվում է ավելի քան 1100 ԱՄՆ դոլար պարտքով:
Իհարկե, այս ցավալի վիճակագրական պատկերի համար պատասխանատուն ոչ միայն կառավարությունն է, սա իշխանությունների գործունեության արդյունքն է, որում պատասխանատվության իրենց մասն ունեն նաև կոալիցիայի անդամ քաղաքական ուժերը: Սակայն չեմ կարծում, որ սա մխիթարանք պետք է լինի կառավարության համար, գործերն ուղղակի վատ են»,- ասաց Բագրատ Ասատրյանը:
