«Պետք է հայկական կողմն անընդհատ բարձրաձայնի այդ հարցը, ճիշտ է` հայտարարությունների մակարդակով ասվում է այդ մասին, բայց հետևողականորեն և համապատասխան փաստաթղթերով չի ներկայացվում այդ խնդիրը»,- կարծիք հայտնեց քաղաքագետ Հրանտ Մելիք-Շահնազարյանը` անդրադառնալով «Առաջին լրատվականի» այն հարցին, թե ինչո՞ւ միջազգային հանրությունը չի արձագանքում այն հանգամանքին, որ Ադրբեջանը խախտում է սպառազինության մասին միջազգային պայմանագիրը:
Մելիք-Շահնազարյանը նշեց, որ երկրների սպառազինությունների մակարդակը վերահսկում է ՄԱԿ-ը և միջազգային հանրության պասիվությունն այս հարցում պայմանավորված է նրանով, որ ներկա պահին մեր տարածաշրջանի սպառազինության նկատմամբ հետաքրքրությունը մեծ չէ. «Ադրբեջանում այսօր կան շատ մեծ խնդիրներ` կապված մարդու իրավունքների և այնտեղ տիրող ռեժիմի հետ, և այդքանը բավական է արևմտյան գերտերությունների համար Ադրբեջանում սեփական շահերը իրականացնելու համար»:
Քաղաքագետի խոսքերով, քանի դեռ տարածաշրջանում կա ուժերի բալանս, սպառազինության տեմպերին այդքան մեծ կարևորություն չեն տալիս:
