Հայաստանում բազմակուսակցական համակարգի առողջացման դեղատոմսերից մեկն էլ կուսակցությունների խոշորացումն է։ Շատերը կարծում են, որ եթե կուսակցությունները խոշորացվեն, միավորվեն, հանրագումարի գան, ապա այդ դեպքում հնարավոր է դրանց հիման վրա ստեղծել մի քանի կուսակցություններ։
Բայց Քաղաքագետների միության նախագահ Հմայակ Հովհաննիսյանը կարծում է, որ դա ճիշտ չէ, որովհետև այդպիսի ապագաղափարական միավորման հիմքի վրա հնարավոր չէ ստեղծել եվրոպական ժողովրդավարական, քաղաքագիտական չափանիշներին համապատասխանող կուսակցություններ։
Այն կարծրատիպը, որ խոշորացման արդյունքում կարելի է առողջացնել մեր քաղաքական համակարգը, այսինքն` եթե այդ խմբակները, որոնք 70-ից անցնում են, միավորվեն և ստեղծվի 2-3 միավորում, ինչով կունենանք լիարժեք միավորում, այս տեսակետը թերի է և սխալ, որովհետև այդ խմբակներն ապագաղափարական հենքի վրա են գործում, հետևաբար գաղափարական հենքի վրա չեն կարող խմբավորվել, չեն կարող միավորվել։ Այստեղ անհատապաշտության մթնոլորտն է իշխելու։
Օրինակ` եթե 10-15 կուսակցություններ հանրագումարի գան, կստեղծվի 10-15 հավակնոտ անհատների միավորում` ապագաղափարական հենքի վրա հիմնված։ Իսկ դա չի կարող համապատասխանել այն չափանիշներին, որոնցով պետք է բնութագրվի կայացած յուրաքանչյուր կուսակցություն»,- պարզաբանեց քաղաքագետների միության նախագահը։
Այսինքն` նման ընտրություն կատարելու դեպքում պետք է ընտրենք վատի և վատագույնի միջև, և այս դեպքում դժվար է ասել, թե որն է ավելի վատ մյուսից։
