Հունվարի 15-ին Հալեպի համալսարանում տեղի ունեցած 2 պայթյունների զոհերի թիվը անցել է 80-ից: Այս մասին հաղորդում է France-Presse-ը՝հղում անելով քաղաքային իշխանությունների և համալսարանական հիվանդանոցի անանուն աղբյուրին:
Հալեպի նահանգապետ Մուհամմադ Վահիդ Ակադըհաղորդել է,որ պայթյունների հետևանքով զոհվել է 82, վիրավորվել՝ 160 մարդ:
Ինչպես նշում է գործակալությունը, համալսարանին կից բնակվում են ոչ միայն ուսանողներ, այլև Հալեպի շրջակայքից շուրջ 30 հազար փախստականներ:
Syrian Observatory for Human Rights կազմակերպության իրավապաշտպանները հաղորդել են, որ երկու պայթյունները տեղի են ունեցել ուսանողական ավանի տարածքում՝ հանրակացարանից և ճարտարագիտական ֆակուլտետից ոչ հեռու:
Կատարվածի համար դեռևս ոչ ոք պատասխանատվություն չի ստանձնել: Կառավարական ուժերը պայթյունների մեջ մեղադրել են ապստամբներին՝ հայտարարելով, որ նրանք զենիթային հրթիռ են կիրառել: Ապստամբներն էլ իրենց հերթին հայտարարել են, որ հարձակումն իրականացրել են սիրիական բանակի կործանիչները: Քաղաքային իշխանություններն ու պետական հեռուստատեսությունը կատարվածն ահաբեկչություն են որակել:
Հալեպ քաղաքը համանուն նահանգի մայրաքաղաքնէ: Նահանգը բաժանված է կառավարական ուժերի և ապստամբների միջև: Համալսարանը գտնվում է սիրիական բանակի կողմից վերահսկվող տարածքում:
