Մոտ ժամանակներս Կոլորադո նահանգի Դենվեր քաղաքում սպասվում է ԱՄՆ-ում առաջին բանկի բացումը, որը կսպասարկի մարիխուանայի վաճառականների բիզնեսը:
The Times-ը հիշեցնում է, որ արդեն մեկ տարի է, ինչ մարիխուանան օրինականացվել է նահանգում՝ նշելով, որ ոլորտն ըստ ամենայնի բարգավաճում է, սակայն վաճառականները տեղ չունեն իրենց գումարները պահելու համար. ավանդական բանկերը հրաժարվում են սպասարկել այդ բիզնեսը: Նրանց համար օրինական վարկի ստացման ճանապարհը փակվել է:
Վարկային հաստատությունը կկրի The Fourth Corner Credit Union անվանումը:
Ոչ միայն բանկերը, այլև վճարային համակարգերը չեն ցանկանում նրանց հետ գործ ունենալ: Մարիխուանա վաճառողների հետ չեն ցանկանում աշխատել նաև ապահովագրողները, իսկ հաշվապահներն ու փաստաբանները վախենում են խորհրդատվություն տրամադրել. դա կարող է ընկալվել որպես անմիջական մասնակցություն հանցավոր գործունեությանը:
Մարիխուանայի օգտագործումը բժշկական նպատակներով օրինականացված է 23 նահանգներում և Կոլումբիայի շրջանում, իսկ 4 նահանգերում՝ Օրեգոնում, Ալյասկայում, Կոլորադոյում և Վաշինգտոնում, թույլատրված է նաև դրա կիրառությունը ժամանցի նպատակով: