Հայաստանում այսօր գրանցված են 74 կուսակցություններ, որոնցից շատերին հասարակությունն ընդհանրապես չի ճանաչում։ Ուստի այսօր Հայաստանի քաղաքագետների միության նախագահ Հմայակ Հովհաննիսյանից հետաքրքրվեցինք, թե այս գաճաճ կուսակցությունները ի՞նչ են տալիս թե՛ ՀՀ քաղաքացիներին, թե՛ Հայաստանի Հանրապետությանն առհասարակ։
«Ես պետք է ասեմ, որ դրանք կուսակցություններ էլ չեն, որովհետև մեզանում բազմակուսակցությունը և քաղաքական պլյուրալիզմը չեն կայացել, և ըստ էության այդ խմբակներն ամենևին էլ կուսակցություններ չեն։
Մեզանում կուսակցությունների մասին օրենքը չի գործում, ինչպես և բազմաթիվ այլ օրենքներ։
Եթե կուսակցությունների մասին օրենքը գործեր, բնականաբար դրանց գործունեությունը կկասեցվեր, որովհետև դրանք չեն բավարարում այն չափանիշներին, որոնք ամրագրված են կուսակցությունների մասին օրենքով և պարտադիր են։
Բայց ինչպես ասում են, մեդալը ունի երկու կողմ, եթե այդ օրենքի դրույթները չեն գործում, բնականաբար այդ կուսակցություն կոչված խմբակների 80 տոկոսը հաստատ չի կարողանալու ապացուցել, որ բավարարում է կուսակցությունների մասին օրենքի պահանջներին։
Այսինքն` ունի համապատասխան թվաքանակ, ունի մարզային կառույցներ։ Այսինքն` այն չափանիշները, որոնք ամրագրված են օրենքով և դրանց պարտադիր պետք է բավարարել»։