Ադրբեջանի սպառազինման տեմպերը օր օրի աճում է, իսկ դրան միջազգային հանրության կողմից որևէ գնահատական չի տրվում, չնայած այն հանգամանքին, որ Ադրբեջանը դրանով խախտում է սպառազինությունների մասին միջազգային պայմանագիրը, որի տակ ստորագրել է:
Ռազմական փորձագետ Արծրուն Հովհաննիսյանի կարծիքով, Ադրբեջանի նավթագազային գործոնը լուրջ լծակ է, և հենց այդ բանի համար բոլորը ներում են նրան. «Միջազգային կազմակերպությունները կողմնակալ դիրքորոշում ունեն այս հարցում:
Այսինքն՝ այն, ինչ կարելի է Ադրբեջանին, ինչը նրան կներեն, մեզ չեն ների: Իսկ դա առաջին հերթին պայմանավորված է նավթի գործոնով»:
Հովհաննիսյանի խոսքերով, Ադրբեջանը մի կողմից միջազգային հանրությանը ներկայանում է իբրև թե հայերի կողմից պատժված, մյուս կողմից էլ շանտաժ է անում` տեսեք, ես սպառազինվում եմ, և եթե այս հարցն իմ օգտին չլուծեք, ես պատերազմ կսկսեմ:
«Բնականաբար, մեծ տերությունները զոհ են գնում դրան, հանուն այն բանի, որ պատերազմ չլինի, քանզի Արևմուտքի նավթագազային ընկերությունները միլիարդավոր ներդրումներ են արել Ադրբեջանում, ինչպես նաև Ռուսաստանն է գազային ոլորտում ներդրումներ արել: Ոչ մեկին պատերազմ պետք չէ, և դրանից ելնելով՝ բոլորը ներում են Ադրբեջանին»:
Սակայն, ըստ Հովհաննիսյանի, միջազգային հանրությունը կարձագանքի, եթե Ադրբեջանի սպառազինման տեմպերը անվերահսկելի դառնան:
«Եթե միջազգային հանրությունը այդ բալանսի մեծ տարբերություն տեսնի, ապա կարձագանքի: Միանշանակ կարող եմ ասել, որ Ադրբեջանի սպառազինության մակարդակը տարածաշրջանում անհավասարակշռություն չի ստեղծում` մենք գրեթե համարժեք սպառազինվում ենք»,- եզրափակեց փորձագետը: