Ադրբեջանական Apa.az կայքի փոխանցմամբ, Ադրբեջանի փոխարտգործնախարար Խալաֆ Խալաֆովն անդրադարձել է վրաց-ադրբեջանական սահմանագծմանը.
«Ներկայումս մեր միջև գոյություն չունի տարածքների փոխանակման խնդիր: Շուտով տեղի կունենա երկու երկրների փորձագետների հանձնաժողովի հերթական հանդիպումը:
Վերջին հանդիպման ժամանակ որոշ տարաձայնություններ առաջացան: Սահմանների 2/3-ը արդեն համաձայնեցված է: Մնացած 1/3-ի սահմաններից մեծամասնության հարցում մեր մոտեցումները համընկնում են:
Պետական սահմանների որոշումը պետք է լուծվի միայն իրավական ճանապարհով: Տարածքների փոխանակման խնդիրը չի գտնվում մեր օրակարգում»:
Իր ամփոփիչ խոսքում Խալաֆովը հավելել է, որ Ռուսաստանի հետ սահմանագծման գործընթացն արդեն ավարտված է. «Պայմանագիրն արդեն ստորագրված է և ներկայացվել է Ադրբեջանի Միլլի մեջլիսի (խորհրդարան) հաստատմանը: Ներկա դրությամբ, Ռուսաստանը նույնպես զբաղված է պայմանագրի հաստատմամբ»:
Հիշեցնենք, որ սրանից առաջ էլ վրացական լրատվամիջոցները նշել էին, որ վրաց-ադրբեջանական սահմանին կատարվել է 69 տարածքային ուղղում:
Դրանցից 42-ը եղել են ի վնաս Վրաստանի, իսկ 27-ը` ի վնաս Ադրբեջանի: Արդյունքում, Վրաստանի տարածքային կորուստները կազմել են մոտ 293 հեկտար:
