ԱՄՆ-ում ռասայական խտրականության դեմ պայքարի մարտիկ, Նոբելյան մրցանակի դափնեկիր Մարտին Լյութեր Քինգը ծնվել է 1929-ի հունվարի 15-ին` Ատլանտա քաղաքում (ԱՄՆ-ի Ջորջիա նահանգ): Նրա հայրը եղել է բապտիստական եկեղեցու հոգևորական: Ընտանիքն ապրել է քաղաքի «սև թաղամասում», որի բնակիչները հիմնականում միջին դասի ներկայացուցիչներ էին:
13 տարեկանում Մարտինն ընդունվել է Ատլանտայի համալսարանին կից լիցեյ, 15 տարեկանում՝ Մորհաուզի քոլեջ: Այդ ժամանակ նա դարձել է «Գունավոր բնակչության առաջընթացի ազգային ասոցիացիայի» անդամ: Այնուհետև Քինգը դարձել է իր հոր օգնականը: 1951-ին աստվածաբանության ոլորտում աստիճան է ստացել Փենսիլվանիայի Չեստեր քաղաքի Քրոզեր սեմինարիայից, 1955-ին՝ փիլիսոփայության դոկտորի աստիճան` Բոստոնի համալսարանից։
Այդ ժամանակ նա դարձել է բապտիստական եկեղեցու հոգևորական` Ալաբամա նահանգի Մոնտհոմերի քաղաքում: Այստեղ նա միացել է սևամորթների իրավունքների համար պայքարի ակցիաներին: Իր քարոզներում նա հանդես է եկել հօգուտ պայքարի ոչ բռնի ձևերի: Ռասայական խտրականության դեմ ոչ բռնի ճանապարհով պայքարելու համար Քինգն արժանացել է Խաղաղության Նոբելյան մրցանակի: Քինգը եղել է ամուսնացած, ունեցել է 4 երեխա:
1968-ին Քինգն առաջնորդել է աշխատավորների բողոքի ցույցը, որի նպատակը գործադուլավոր աշխատավորներին պաշտպանելն էր, իսկ ապրիլի 4-ին դիպուկահարի ձեռքով մահացու վիրավորվել է: Նրան սպանող անձը դատապարտվել է 99 տարվա ազատազրկման:
1986-ից սկսած` հունվարի երրորդ երկուշաբթին ԱՄՆ-ում նշվում է որպես ազգային տոն՝ Մարտին Լյութեր Քինգի օր:
