Եգիպտոսում արգելված և ահաբեկչական համարվող «Մուսուլման եղբայրներ» կազմակերպության չորս առաջնորդներ դատապարտվել են մահապատժի: Այս մասին հաղորդում է TASS գործակալությունը:
Ինչպես նշում է մեղադրող կողմը՝ իսլամիստները մեղադրվում են ոչ միայն մարդկանց մահվան համար, այլև սպանության դրդման, զենքի անօրինական պահպանման, հասարակական կարգը խախտելու և խաղաղ բնակչության վրա հարձակումների համար:
Խոսքը հունիսի 30-ի լույս հուլիսի 1-ի արյունոտ դեպքերի մասին է, որ տեղի են ունեցել Կահիրեի Մուկատալ լեռան վրա գտնվող «եղբայրների» գլխավոր գրասենյակում: Այժմ գահընկեց արված իսլամիստ նախագահ Մուհամմադ Մուրսիի հակառակորդները հարձակվել էին գրասենյակի վրա: Ի պատասխան իսլամիստական խմբավորման՝ ղեկավարությունը որոշել էր պաշտպանել իրենց նստավայրը՝ օգտագործելով հրազեն: Արդյունքում հրաձգության հետևանքով ավելի քան 10 մարդ էր զոհվել, իսկ 90-ը ստացել էին հրազենային վնասվածք: Ինչպես հետագայում ցույց է տվել փորձաքննությունը՝ շատերը սպանվել էին գլխին հրազենային վնասվածք ստանալու հետևանքով:
Ըստ այդմ՝ Եգիպտոսում գործող իրավական պրակտիկայով, բոլոր մահապատիժները պարտադիր կարգով փոխանցվում են երկրի գլխավոր կրոնական ներկայացուցչին, որը կա՛մ հաստատում է որոշումը, կամ էլ որոշում է ներում շնորհել դատապարտյալին: Այն բանից հետ, երբ Եգիպտոսի գլխավոր մուֆթին կստորագրի դատավճիռը, քրեական դատարանը կկայացնի վերջնական որոշում, որը կհրապարակվի մյուս տարվա փետրվարի 28-ից ոչ շուտ:
