Հյուսիսային համալսարանի ՀՀԿ-ական ռեկտոր Բորիս Մակիչյանի կարծիքով՝ վերջին տարիներին մասնավոր բուհեր դիմորդների սակավությունը պայմանավորված է տեղի ունեցած արդար մրցակցային պայմանների «կարկտահարումով»: «Առաջին լրատվական»-ի հետ զրույցում նա նշեց, որ 2014-ին Հյուսիսային համալսարան ավարտել է 850 հոգի, որոնցից 801-ը արժանացել է պետական դիպլոմների, իսկ այս տարի ընդունվել է 101 ուսանող:
Նրա խոսքով՝ մասնավոր բուհերի մեծ մասը իսկապես որակ չի ապահովում, կան բուհեր, որ խախտումներ են թույլ տալիս, սակայն առավել խախտումներ թույլ են տրվում պետական բուհերում, բայց նրանց վրա դա չի ազդում:
Ռեկտորի խոսքով՝ ԿԳ նախարարությունը հատուկ պետական բուհերի նախարարություն է, մասնավոր բուհերի համար ամեն մի ելույթ՝ գրավոր թե բանավոր, հակագովազդային է:
«Հարյուր անգամ ասել եմ՝ ԱԺ հարց մտցրեք, որ այնպես, ինչպես Շվեդիայում է, բարձրագույն կրթությունը պետության մենաշնորհն է, և այնտեղ բոլոր ուսանողներին ոչ թե կրթաթոշակ, այլ աշխատավարձ են տալիս. խորհրդային տարիներին էլ է այդպես եղել»,- ասաց նա:
Ռեկտորը չժխտեց, որ այս տարի դասախոսներին աշխատավարձ տալու համար ստիպված են եղել վարկ վերցնել:
«Մի քանի օր առաջ վարչապետի մոտ էինք: Վարչապետը լավ լուծումներ է առաջարկում, բայց ես հույս չեմ կապում: Բոլոնիայի հռչակագրում գրված է, որ բուհերը և գիտական հիմնարկները պետք է անկախ լինեն տնտեսական և քաղաքական ղեկավարությունից, բայց այսօր մեր նախարարը կառավարող կուսակցության նախագահի առաջին տեղակալն է և կառավարությունում ինչ հարց ուզի՝ կլուծի, նույնը անում է ԱԺ-ում»,- հավելեց ռեկտորը:
Նա վստահ է, որ Հյուսիսային համալսարանը չեն կարող փակել. եթե հանրապետությունում երկու բուհ մնա, մեկը Հյուսիսային համալսարանն է լինելու:
Վարչապետն էլ խոստացել է նոյեմբերի 28-ին այցելել Հյուսիսային համալսարան, բայց չի եկել: Ռեկտորի կարծիքով՝ փոխադարձ համաձայնություն է եղել նախարարի և վարչապետի միջև:
Հարցազրույցն ամբողջությամբ՝ տեսանյութում: