2013 թվականը կուբացիներին ամբողջ աշխարհով ազատ ճանապարհորդելու հնարավորություն է բերել: Դա կարող են անել միայն նրանք, ովքեր բավականին գումար ունեն՝ անձնագրեր ձևակերպելու, տոմսեր գնելու համար, ինչպես նաև՝ եթե չեն հանդիսանում մեծ սպորտսմեններ կամ պետական գաղտնիքների կրողներ: Այս տարվա հունվարի 14-ին ուժի մեջ է մտել «ելքի վիզաները» չեղյալ հայտարարելու մասին օրենքը:
1961-ից ի վեր առաջին անգամ երկրի չափահաս մարդիկ իրավունք են ստացել առանց իշխանությունների համաձայնության և ընդունող կողմի հրավերքի արտասահման մեկնել: Իսկ կուբացիների արտասահմանում մնալու ժամկետը մեկ տարվանից երկարաձգվել է մինչև երկու տարի:
Անհրաժեշտ փաստաթղթերի ձևակերպումը նախկին 300 դոլարի փոխարեն կրճատվել է և այժմ ընդամենը 100 դոլար է կազմում, որը համապատասխանում է Կուբայի միջին բնակչի հինգ ամսվա աշխատավարձին:
ԱՄՆ-ը, որտեղ զգալի թվով կուբացի ներգաղթյալներ են ապրում, ուշադիր հետևում է Կուբայում կատարվող իրադարձություններին: Վաշինգտոնն այս օրենքը հանգիստ է ընդունել՝ հայտարարելով, որ իրենք «ցանկանում են, որ Կուբան հարգի մարդու իրավունքները»:
Հավանաբար այս օրենքը կնպաստի աշխատելու նպատակով արտասահման մեկնողների թվի աճին: Ներկա պահին Կուբայում գործում է մի օրենք, որի համաձայն՝ ԱՄՆ-ում ապրող կուբացիները կարող են իրենց հարազատներին գումար ուղարկել: Հավանական է, որ այս օրենքը կտարածվի նաև այլ երկրներում աշխատող կուբացիների վրա:
