Ես հենց այն փորձագետների թվին եմ պատկանում, որոնք բացասական ակնկալիքներ ունեն Ռուսաստանի նախագահի Անկարա այցից: Այս մասին մեզ հետ զրույցում նշեց «Մոդուս Վիվենդի» կենտրոնի ղեկավար, քաղաքագետ Արա Պապյանը:
«Կարծում եմ՝ առաջին խնդիրը, որ Թուրքիան իր համար կլուծի, Ռուսաստանի միջոցով Հայաստանին հնարավորինս չեզոքացնելն է: Այսինքն` այնպես անել, որ Ցեղասպանության 100-ամյակի, իրենց խոսքով, «հայկական ցունամին» տեղի չունենա: Մենք տեսնում ենք, որ այդպես էլ լինում է. այսօր տեղի է ունենում Ցեղասպանության 100-ամյակի քաղաքական էության պարպում, և այն միջոցառումների շարքի վերածում՝ համերգներ, մրցույթներ, ցուցահանդեսներ և այլն: Սրանք գուցեև անհրաժեշտ են, բայց բավարար չեն: Եթե 100-ամյակին մենք որպես պետություն հանդես չգանք քաղաքական օրակարգով և հստակ չդնենք հարցերը, թե ինչ ենք ուզում, ինչի հիման վրա ենք ուզում, ինչի համար ենք ուզում, ապա Ցեղասպանության 100-ամյակը կլինի սովորական միջոցառում»,-ընդգծեց նա:
Հարցին, թե հիմա Հայաստանն ի՞նչ է ուզում և ինչպես պիտի հասնի իր ուզածին, Պապյանը պատասխանեց. «Ես չեմ կարող պետության կողմից խոսել: Իմ անունից կարող եմ ասել, որ մենք ուզում ենք Հայաստանի տարածքային ամբողջականության վերականգնում: Դա կարող է լինել երկու ձևով. մեկը նախկին Արևելյան Հայաստանի տարածքի վրա ուղղակի ինքնիշխանության հաստատում, երկրորդը՝ Վիլսոնյան Հայաստանի տարածքների վրա մեր իրավունքների վերահաստատում: Այսինքն մենք որոշակի իրավունքներ ենք ամրագրում, հնարավորություններ ենք ստանում, որը կլուծի Հայաստանի առջև ծառացած բազմաթիվ խնդիրներ տարածքային մասով: Մենք ուզում ենք հատուցումներ ազգային, եկեղեցական գույքի դիմաց, և նաև ուզում ենք, որ ընտանիքներն ու անհատները, որոնք տուժել են ցեղասպանությունից, ստանան համարժեք հատուցումներ»:
Անդրադառնալով փաստին, որ Ռումինիայի դեսպանը օրերս անպարկեշտ արտահայտություններ էր թույլ տվել Հայոց ցեղասպանության հարցը համեմատելով նույնասեռականության հետ և ասելով, որ ամեն մեկն իր արժեքներով է նայում իրականությանը, քաղաքագետը նկատեց. «Արտաքին քաղաքականությունը ներքինի շարունակությունն է: Եթե դուք չունեք ներքին քաղաքականության մեջ հարգանք օրենքի, քաղաքացու իրավունքների նկատմամբ, օտարները, այդ թվում դեսպանները դա տեսնում ու նույնկերպ շարունակում են: Ինչու դեսպանը, որը որևէ պարտավորություն չունի այդ հասարակության նկատմամբ պիտի իրեն ավելի ճիշտ պահի, քան հասարակության կողմից ընտրված պատգամավորները: Մեր պատգամավորներն ավելի լավ արտահայտություններ չեն անում մեր ժողովրդի ու հայրենիքի մասին: Իհարկե այստեղ կա նաև դեսպանի սխալ վարքագիծը, բայց դա այլ հարց է: Ես վստահեցնում եմ, որ եթե մեզ ճիշտ դրսևորենք ոչ մի դեսպան իրեն այդպես չի պահի: Եթե պատգամավորն ասում է, որ մենք սովից կսատկենք, միշտ ինչ-որ մեկի լծի տակ ենք եղել, ավելի լավ է ռուսի լծի տակ լինենք, էլ ի՞նչ սպասես օտարից: Այդ մարդիկ տարրական պատմություն չգիտեն, որ Հայաստանը հաջողություններ է արձանագրել այն ժամանակ, երբ Հարավային Կովկասում Ռուսաստանի դերը թուլացել է»:
Ավելին՝ տեսանյութում:
