Թեև այսօր դոլարի կուրսը քիչ թե շատ կայունացել է, սակայն բանկերը դեռևս խուսափում են ազատ դոլար վաճառել, որի գնորդներն օր օրի շատանում են: Քաղաքացիների հետ զրույցում պարզեցինք, որ շատ դժվարությամբ, մի քանի բանկ մտնելուց հետո է իրենց հաջողվում դոլար վաճառել կամ գնել: Օրինակ «Բիբլոս» բանկում երեկ դոլարի վաճառք չէր իրականացվում: Իսկ առհասարակ, այս բանկում արտարժույթ վաճառում են միայն այն մարդկանց, ովքեր իրենց բանկի հաճախորդներն են:
Դոլարի կուրսի փոփոխությունից առաջացած աժիոտաժն ավելի մեծ է բանկերի հատկապես մարզային մասնաճյուղերում: Բանկերից մեկի մարզային մասնաճյուղի աշխատակիցը մեզ հետ զրույցում նշեց, որ հատկապես մասնաճյուղերում իրավիճակն ավելի անկանխատեսելի է: «Բնականաբար, մենք չենք կարող ստեղծված վիճակում ազատ արտարժույթի առքուվաճառք իրականացնել, քանի որ, դժվարանում ենք շատ արագ կուրս ճշտել: Իսկ դոլարի կուրսը, հայտնի է, որ գրեթե 30 րոպեն մեկ փոխվում է: Սպասում ենք գլխամասից եկող ճշտումներին և նոր միայն կողմնորոշվում ենք, թե ինչքանով վաճառենք, կամ, առհասարակ, այդ պահին վաճառե՞նք, թե՛ ոչ»,- ասաց մեր զրուցակիցը:
Մարզերում խուճապը մեծ է ոչ միայն դոլարի փոխանակում իրականացնող քաղաքացիների, այլև դոլարով վարկ վերցրածների շրջանում: Նրանք դեռ չեն կողմնորոշվում, թե հաջորդ ամիս դոլարը որքան կբարձրանա, և իրենք, փաստորեն, ստիպված կլինեն ավելի շատ վճարել, քան մինչ այդ վճարում էին: «Այ բալամ, առանց այդ էլ տոկոսի տակ ճռռում ենք, էս դոլարի բարձրացումն էլ լրիվ մեր տունը կքանդի: Հերիք չի՝ էդքան տոկոս ենք տալիս, վարկն ենք փակում, հիմա էլ ավելի շատ պետք է տանք, համարյա 10-20 տոկոս: Չգիտեմ՝ մեր վերջը ինչ կլինի»,- «Առաջին լրատվական»-ի հետ զրույցում դժգոհեց վայոցձորցի Արամայիս Վարդանյանը՝ հավելելով. «Մենակ գիտեմ, որ էս վիճակը պետք է հնարավորինս շուտ կարգավորել, մարդիկ մեղք են: Էս թանկացումների ձեռն էլ կրակն ենք ընկել, դրան էլ որ գումարվի էս ամեն ինչը, լրիվ խայտառակ վիճակում կհայտնվենք»:
Մեր մեկ այլ զրուցակից, որը ևս բավականին մեծ դոլարային վարկ ուներ, արդեն իսկ տեղեկացրել էր արտասահմանում գտնվող իր հարազատներին ստեղծված վիճակի մասին, որպեսզի հաջորդ ամիս գումար ուղարկելուց հաշվի առնեն նաև այդ հավելումները: «Բա ի՞նչ անեմ, իմ չնչին աշխատավարձով չգիտեմ՝ որ մեկը հասցնեմ: Գազը թանկացավ, լույսը թանկացավ, ուտելիքը, ամեն ինչ թանկացել է, հիմա էլ վարկի տոկոսները թանկացան: Ստիպված ասել եմ, որ դրսից բարեկամներս մի քիչ օգնեն: Էս վիճակ չի, որով մենք ապրում ենք»,- դժգոհեց մեր զրուցակիցը:
Նշենք, սակայն, որ այսօր երեկվա համեմատությամբ դոլարի փոխարժեքը որոշակիորեն նվազել է: Այն այսօր կազմում է միջինը 450 դրամ 1 դոլարի դիմաց: Տնտեսագետները, սակայն, դժվարանում են ասել, թե վաղն ինչ է սպասվում, կշարունակվի՞ դոլարի արժեքի բարձրացումը, թե՞ ոչ: «Կանխատեսումն ամենաանշնորհակալ գործն է: Մանավանդ Հայաստանում, որտեղ դոլարի գնի բարձրացումը մեր տնտեսության հետ ընդհանրապես կապ չունի: Այլ ազդակների հետ կապված է փոփոխությունը կատարվում, հետևաբար, որքան էլ տնտեսագետ լինես, հնարավոր չէ ասել, թե ինչ է սպասվելու»,- մեզ հետ զրուցելիս ասաց բանկի աշխատակիցը:
